އެންމެ ބޮޑު އިސްކަމައެއް ދެނީ ސިފްކޯ ހިޔާ މަސަތްކަތް ނިންމައި ސިފައިންނާ ހަވާލުކުރުން: އެމްއެންޑީއެފް
6 ފެބުރުއަރީ 2019 | ބުދަ 09:42ރަށްތަކުގެ ކައުންސިލްތަކާ ގުޅިގެން ހޭލުންތެރި ޕްރޮގްރާމް ހިންގުމަށް ނިންމާފައިވޭ
ބުދަ ދުވަހު ބޭއްވި ބައްދަލުވުމުގެ ތެރެއިން
އެމްއެންޑީއެފުން މިހާރު އެންމެ ބޮޑަށް އިސްކަމެއް ދޭ އެއްކަމަކީ ސިފްކޯ ހިޔާ މަސަތްކަތް ނިންމައި ސިފައިންނާ ހަވާލުކުރުން ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވިދާޅުވެއްޖެއެވެ.
ބުދަ ދުވަހު ނޫސްވެރިންނަށް މައުލޫމާތު ދެއްވަމުން ޝަމާލް ވިދާޅުވީ ސިފްކޯ ހިޔާގެ ޕްރޮޖެކްޓަކީ މީގެ ހަ އަހަރު ކުރިން ފެއްޓި މަޝްރޫއެއް ކަމަށާއި އެ މަސަތްކަތް އަވަހަށް ނިންމައި ސިފައިންގެ ވެލްފެއަރ ކަންތައްތަކަށް ވަރަށް ބޮޑު އިސްކަމެއް އެމްއެންޑީއެފުން ދޭނެ ކަމަށެވެ.
ސިފައިންގެ ފްލެޓްތަކުގެ މަސައްކަތް ނުނިމި ދިގުލައިގެން ގޮސްފައިވާ އިރު އެތަންތަން ވީއެންމެ އަވަހަށް ނިންމައި ހަވާލުކުރުމަކީ މި ސަރުކަރުގެ ވައުދެކެވެ.
މީގެ އުތުރުން ޝަމާލް އެ ބައްދަލުވުމުގައި ވިދާޅުވީ ރައްޔިތުންގެ ބަލައިގަންނަ ލޯބި ލިބޭ ފަންނީ ބަޔަކަށް ހެދުމަށް ރިފޯމްގެ ނަމުގައި ކޮމެޓީއެއް އެކުލަވާލައިފައި ވާކަމަށެވެ. ކޮމެޓީގެ އަމާޒަކީ ސިފައިން ޕްރޮފެޝަނަލް އަދި ފަންނީ ބަޔަކަށް ހެދުން ކަމަށް ވިދާޅިވިއެވެ.
ސިފައިންގެ ރޭވިފައިވާ ސިޔާސަތުތައް ހާމަކުރަމަށް އައު ލީޑަރޝިޕްގެ ފަރާތުން ބޭއްވި ފުރަތަމަ ބައްދަލުވުމުގައި ވަނީ ރައްޔިތުންނަށް ދެވޭ ހިދުމަތްތައް ރަނގަޅުކޮށް އޭރިއާތަކަށް ދޭ ހިދުމަތް ފުޅާކުރާނެ ކަން ހާމަކޮށްފައެވެ. އެގޮތުން ވައިސް ޗީފް އޮފް ޑިފެންސް ފޯސް އަބްދުލްރަހީމް އަބްދުއްލަތީފް ވިދާޅުވީ އަލިފާނުގެ ހާދިސާތަކާއި ކަނޑުމަތީގެ ހާދިސާތައް ގިނައިން ހިނގާކަން ފާހަގަކުރައްވައި މިކަންތައް މަދުކުރުމަށްޓަކައި ރަށްތަކުގެ ކައުންސިލްތަކާ ގުޅިގެން ހޭލުންތެރި ޕްރޮގްރާމް ހިންގުމަށް ނިންމާފައިވާ ކަމަށެވެ. އަދި ދަނޑު ބިން އެންދުމުގައި ވެސް ސަލާމަތީ ކަންކަން ބަލައިގެން މަސަތްކަތްކުރުމަށް ވަނީ އިލްތިމާސްކޮށްފައެވެ. މީގެ އިތުރުން އެމްއެންޑީއެފުން ވަނީ މިހާރަކަށް އައިސް ހިނގާ ކަނޑުމަތީ ހަދިސާތަކުގެ މަސްވެރިން ވެދޭ އެހީތެރިކަން ފާހަގަކޮށް އެ ފަރާތްތަކަށް އެމްއެންޑީއެފް އިން ޝުކުރު އަދާކޮށްފައި ވެއެވެ.
