ކުޑަކުއްޖަކަށް ޖިންސީ ގޯނާކުރި މައްސަލައަކާއި ގުޅިގެން ބިދޭސީއަކު ހޯދަނީ
5 ފެބުރުއަރީ 2019 | އަންގާރަ 17:11ދާދިފަހުން ވަނީ މާލޭގެ ބުކްޝޮޕެއްގެ ތެރޭގައި ނުވަ އަހަރުގެ އަންހެން ކުއްޖަކަށް ބިދޭސީއަކު ޖިންސީ ފުރައްސާރަ ކޮށްފަ
ފުލުހުން ހޯދާ ބިދޭސީ މީހާ
އައްޑޫ ސިޓީ ހިތަދޫ ޕޮލިސް ސްޓޭޝަނުން ތަޙުޤީގު ކުރަމުންދާ، ކުޑަކުއްޖަކަށް ޖިންސީ ގޯނާކުރިކަމަށް ތުހުމަތު ކުރެވޭ މައްސަލައަކާއި ގުޅިގެން ބިދޭސީއަކު ހޯދުމުގެ މަސައްކަތް ފުލުހުން ފަށައިފިއެވެ.
ފުލުހުން ބުނީ ނޯޔަން ނަމަކަށް ކިޔާ އެ މީހާ ހޯދަނީ ސ. ހިތަދޫ ފުލުހުންގެ މަރުކަޒަށް ހުށަހަޅާފައިވާ މައްސަލައަކާ ގުޅިގެން ކަމަށެވެ.
އެހެންކަމުން ފޮޓޯގައިވާ ބަނގުލަދޭޝްގެ ރައްޔިތެއްކަމަށްވާ ނޯޔަން (ޕާސްޕޯރޓް ނަމްބަރ 0308415 އޭބީ) އާއި ބެހޭ އެއްވެސް މައުލޫމާތެއް ލިބިފައިވާ ނަމަ ހިތަދޫ ޕޮލިސް ސްޓޭޝަނަށް ގުޅައި އެކަން އެންގުމަށް ފުލުހުން ވަނީ އިލްތިމާސްކޮށްފަ އެވެ. މި މައްސަލައިގެ އިތުރު ތަފްސީލެއް ފުލުހުން ހާމައެއް ނުކުރެ އެވެ.
ދާދިފަހުން ވަނީ މާލޭގެ ބުކްޝޮޕެއްގެ ތެރޭގައި ނުވަ އަހަރުގެ އަންހެން ކުއްޖަކަށް ބިދޭސީއަކު ޖިންސީ ފުރައްސާރަ ކޮށްފައެވެ. އެހާދިސާ ހިނގި ކުއްޖާގެ މަންމައާއި އެކު އެ ބުކްޝޮޕްގައި ހުއްޓައެވެ. "ރާއްޖެއެމްވީ" އަށް މައުލޫމާތު ދެމުން އެ އަންހެން ކުއްޖާގެ މަންމަ ބުނީ، އެ ހާދިސާ ހިނގާފައި ވަނީ ހޮނިހިރު ދުވަހުގެ ހަވީރު 5:45 ހާއިރު ހެންވޭރުގައި ހުންނަ ބުކްޝޮޕެއްގެ ތެރޭގައި ކަމަށާއި، ދަރިފުޅަށް ޖިންސީ ގޯނާ ކުރީ އޭނާ ކައިރީގައި ހުއްޓާ ކަމަށެވެ.
މި މައްސަލަ ޖެންޑާއަށާއި ފުލުހުންނަށް މިހާރު ވަނީ ހުށައަޅާފައެވެ.
ކުޑަކުދިންނަށް ޖިންސީ ގޯނާ ކުރުމާއި ކުޑަކުދިންނަށް ކުރާ އަނިޔާތައް އަހަރުން އަހަރަށް އިތުރުވަމުން އަންނަ ކަމަށް މިނިސްޓްރީ އޮފް ޖެންޑާގެ ތަފާސް ހިސާބުތަކުން ދައްކަ އެވެ.
