ލަންކާއިން ރާއްޖެއަށް ފުރިހަމަ އެއްބާރުލުން ދޭނަން: ސިިރިސޭނާ
5 ފެބުރުއަރީ 2019 | އަންގާރަ 13:52ސަރަހައްދީ ގުޅުން ބަދަހިކުރުމާ ބެހޭ ގޮތުން ވަނީ މަޝްވަރާކުރައްވާފައި
މައިތިރިޕާލަ ސިރިސޭނަ (ކ) އާއި ރައީސް ސޯލިހު (ވ)
އަވަށްޓެރި ސްރީލަންކާ އިން ރާއްޖެއަށް ފުރިހަމަ އެެއްބާރުލުން ދޭނެ ކަމަށް އެ ގައުމުގެ ރައީސް މައިތިރިޕާލަ ސިރިސޭނަ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ދިވެހިރާއްޖެ އާއި ސްރީލަންކާއާ ދެމެދު އަންގާރަ ދުވަހު ބޭއްވި ރަސްމީ މަޝްވަރާތަކުގައެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސް ސިރިސޭނަ ވިދާޅުވީ، ރާއްޖެއަކީ އަބަދުވެސް ސްރީލަންކާއާ ގާތް ގުޅުމެއް ބާއްވަމުން އަންނަ ގައުމެއް ކަމަށާއި، ދެ ގައުމުގެ ދޭތެރޭގައި އޮންނަ ގުޅުމަކީ ވަރުގަދަ ގުޅުމެއް ކަމަށެވެ. އަދި މީގެ އިތުރުން ސްރީ ލަންކާއިން ރާއްޖެ އަށް ފުރިހަމަ އެއްބާރުލުން ދޭނެ ކަމުގެ ޔަގީން ކަންް ރައީސް ސޯލިހު އަށް ސްރިސޭނާ އަރުވާފައިވާ ކަމަށް ރައީސް އޮފީހުން މައުލޫމާތުދެއެވެ.
ލަންކާ އިން ރާއްޖެ އަށް ދީފައިވާ އެހީތައް ފާހަގަ ކުރައްވަމުން ރައީސް ސޯލިހު ވިދާޅުވީ، ލަންކާއާ ގުޅިގެން އިތުރަށް މަސައްކަތް ކުރުމުގެ ޝައުގުވެރިކަން ރާއްޖެއިން އެބަހުރި ކަމަށެވެ. ރައީސް ސޯލިހު އާއި ސިރިސޭނަ ވަނީ ދެ ގައުމުގެ ދެމެދުގައި އޮތް މަސްވެރިކަމާއި، ޓޫރިޒަމް، ވިޔަފާރި، އަދި ސިއްހި ދާއިރާ ގުޅުން އިތުރަށް ވަރުގަދަ ކުރުމުގެ މުހިއްމު ކަމަށް އަލިއަޅުވާލައްވާފައެވެ. އަދި ހާއްސަކޮށް މޫސުމަށް އަންނަ ބަދަލުތަކާ ދެކޮޅަށް ދެ ގައުމު ގުޅިގެން މަސައްކަތް ކުރުމުގެ މުހިއްމު ކަމުގެ މައްޗަށް ދެ ރައީސުން މަޝްވަރާކުރައްވާފައިވާ ކަމަށް ވެސް ރައީސް އޮފީހުން މައުލޫމާތުދެއެވެ.
ސަރަހައްދީ ގުޅުމުގެ މުހިއްމު ކަމުގެ މައްޗަށް ރައީސް ސޯލިހު ވަނީ މި ބައްދަލުވުމުގައި އަލިއަޅުވާލައްވާފައެވެ. ރައީސް ސޯލިހުގެ ވާހަކަފުޅަށް އެއްބަސްވެ ވަޑައިގަންނަވަމުން ސިރިސޭނަ ވިދާޅުވީ، ސަރަހައްދީ ގުޅުން ބަދަހި ކުރެވޭނީ އެއްގައުމުން އަނެއް ގައުމަށް އެހީވެދީގެން ކަމަށެވެ. ސްރީލަންކާގެ ރައީސްގެ އޮފީހުގައި ބޭއްވި ބައްދަލުވުމުގައި ފޮރިން މިނިސްޓަރ އަބްދުﷲ ޝާހިދު، އިކޮނޮމިކް މިނިސްޓަރ ފައްޔާޒް، ޕްލޭނިން މިނިސްޓަރ މުހައްމަދު އަސްލަމްގެ އިތުރުން ރާއްޖެއިން ލަންކާ އަށް ކަނޑައަޅަފައިވާ ސަފީރު އުމަރް އަބްދުލް ރައްޒާގުވެސް ވަނީ ބައިވެރިވެވަޑައިގެންފައެވެ.
ލަންކާގެ ރައީސްގެ ދައުވަތަށް ރައީސް ސޯލިހު އެ ގައުމަށް މިހާރު ކުރައްވަމުން ގެންދަވާ ދަތުރުފުޅު ނިންމާލެއްވުމަށް ފަހު ރާއްޖެވަޑައިގަންނަވަން ހަމަޖެހިފައި ވަނީ މިރޭގެ ވަގުތެއްގައެވެ
