ސްޓާ ޕްލަސް އިން ދައްކަމުންދާ ޑްރާމާ ސީރިއަލް "ކަސައުޓީ ޒިންދަގީކީ" ގައި ކޮމޯލިކާގެ ރޯލު ކުޅެމުންދާ ހީނާ ޚާން ދުވަސް ކޮޅަކަށް އެޑްރާމާ އިން ނުފެންނާނެ ކަމަށް އޭނާ ބުނެފިއެވެ.
ހީނާ މި ޝޯ އިން ވަކިވި ކަމަށް މީޑިއާގައި ދެކެވޭ ވާހަކަތަކާ ގުޅޭ ގޮތުން "ބޮމްބޭ ޓައިމްސް" އަށް ދިން އިންޓަވިއުއެއްގައި ހީނާ ބުނެފައި ވަނީ އޭނާ އެ ޝޯ ހުއްޓާ ނުލާ ކަމަށެވެ. ނަމަވެސް ފިލްމެއްގެ މަސައްކަތް ކުރުމަށްޓަކައި ފަހެއް ނޫނީ ހަމަސް ދުވަހުގެ ބްރޭކަކަށް ދާ ކަމަށް ވަނީ ބުނެފައެވެ.
ހީނާ ފިލްމެއްގެ މަސައްކަތް ކުރުމަށް ހަމަޖެހިފައިވީ ނަމަވެސް އެ ފިލްމާ ގުޅޭ ގޮތުން އެއްވެސް ތަފްސީލެއް ހާމަކޮށްފައެއް ނުވެއެވެ. ހީނާ ބުނެފައި ވަނީ މި ޝޯ އުފައްދާ ފަރާތާއި އޭނާގެ ނިންމުމާ ގުޅޭ ގޮތުން ވާހަކަ ދައްކާފައިވާ ކަމަށާއި އެ ޝޯއަށް ބޭނުންޖެހިއްޖެ ކޮންމެ ހިނދެއްގައި އެނބުރި އަންނާނެ ކަމަށެވެ.
"ކަސައުޓީ ޒިންދަގީކީ" އަކީ ހީނާ ފެނިގެންދާ ދެވަނަ ޓީވީ ސީރިއަލްއެވެ. ހީނާ އެންމެ ފުރަތަމަ ކުޅެފައިވަނީ ސްޓާ ޕަލްސް އިން ދެއްކި "ޔޭ ރިޝްތާ ކިޔާ ކެހެލާތާހޭ" އިންނެވެ. އެ ސީރީޒްގެ ލީޑްރޯލް ހީނާ ވަނީ އަށް އަހަރު ވަންދެން ކުޅެފައެވެ.
މީގެ އިތުރުން ހީނާ ވަނީ "ބިގް ބޮސް 11" އަދި "ޚަތްރޯންކޭ ކިލާޅީ 8" ގައި ވެސް ފެނިގެން ގޮސްފައެވެ.
