މެލޭޝިއާގައި ކުރިޔަށްދިޔަ ޓިއޯމަން ފެސްޓިވަލް 2019 ގެ ޗެމްޕިއަންކަން ހޯދި އަލީ ހުޝްރުވާން (ކުޑަ އައްޔަ) އަދި ރަނަރަޕްކަން ހޯދި އަލީ ޖާވިދު (ޖާއްޓެ) އަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަރުހަބާ ދަންނަވައިފިއެވެ.
އަމިއްލަ ގޮތުން ރާއްޖޭގެ ބައެއް ރާޅާއެޅުންތެރިން ވާދަކުރި މި މުބާރާތުގެ އެއްވަނަ ކުޑަ އައްޔަ އަދި ދެވަނަ ޖާއްޓެ ހޯދީ މެލޭޝިއާ އާއި ސިންގަޕޫރުގެ ރާޅާއެޅުންތެރިންނާ ވާދަކޮށްގެންނެވެ. މުބާރާތުގައި 35 ރާޅާއެޅުންތެރިން ވަނީ ވާދަކޮށްފައެވެ.
Congratulations to Maldivian surfers Kuda Ayya @ali_khushruwan and Jaatte @jaattte for winning the 1st and 2nd place respectively in the Tioman surf festival held in Tioman, Malaysia from 1st and 2nd February 2019. Proud to see Maldivian surfers excelling internationally. pic.twitter.com/ekYrdClPYz
— Ibrahim Mohamed Solih (@ibusolih) February 4, 2019
ރާއްޖެއެމްވީއަށް މައުލޫމާތު ދެއްވަމުން ކުޑަ އައްޔަ ބުނީ، ހޯދި ކާމިޔާބީއަށް ރައީސް ސޯލިހު މަރުހަބާ ދަންނަވައި އަގުވަޒަން ކުރެއްވުމުން ވަރަށް އުފާވާ ކަމަށާއި، ކާމިޔާބު ހޯދަން އިތުރު ހިތްވަރެއް ލިބިގެން ގޮސްފައިވާ ކަމަށެވެ.
ކުޑަ އައްޔަ ބުނީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރާޅާއެޅުންތެރިންގެ އަގުވަޒަން ކުރައްވާފައިނުވާ ކަމަށާއި، މި ސަރުކާރުން ރާޅާއެޅުންތެރިންގެ އަގުވަޒަން ކުރައްވާތީ އުންމީދުތަކެއް އާވެގެން ގޮސްފައިވާ ކަމަށެވެ.
މީގެއިތުރުން ކުޑަ އައްޔަ ބުނީ، ޓިއޯމަން ފެސްޓިވަލްއަކީ ލެވެލްއަށް ބަލާއިރު މާ ބޮޑު މުބާރާތެއް ނޫން ކަމަށާއި، ނަމަވެސް މުބާރާތަކުން ވަނައެއް ލިބޭ ކޮންމެ ފަހަރަކީ ދިވެހިންނަށް ލިބޭ ބޮޑު ފަހުރެއް ކަމަށެވެ.
Congratulations @kuda_ayya for winning 1st & Ali Javed for winning 2nd in #Tiomanfestival2019 #Maldives #Bodyboarding ? pic.twitter.com/nejiYy7Evf
— Ahmed Mahloof (@AhmedMahloof) February 3, 2019
ރައީސް ސޯލިހުގެ އިތުރުން ޔޫތު މިނިސްޓަރު އަހުމަދު މަހުލޫފްވެސް ވަނީ ކުޑަ އައްޔަ އަދި ޖާއްޓެ ހޯދި ކާމިޔާބީއަށް މަރުހަބާ ދަންނަވާ ޓުވީޓް ކުރައްވާފައެވެ.
މުބާރާތުގައި ވާދަކުރި ރާޅާއެޅުންތެރިން އެނބުރި ރާއްޖެ އައުމަށް ހަމަޖެހިފައިވަނީ އަންނަ ބުދަ ދުވަހުއެވެ.
ރާއްޖޭގެ ރާޅާއެޅުންތެރިން އަންނަނީ ސަރަހައްދީ މުބާރާތްތަކުގައި ގިނަ ވަނަތައް ހޯދާ ދިވެހިން ފަޚުރުވެރި ކޮށްދެމުންނެވެ.
