ފްރާންސުން ހޮންގް ކޮންގްއަށް އެތެރެކުރި އަލުވި ޝިޕްމަންޓަކުން ނުގިވައި އޮތް ފުރަތ މަ ބޮޑު ހަނގުރާމައިގެ ދުވަސްވަރުގެ އަތުބޮމެއް ފެނިއްޖެއެވެ.

ހޮނިހިރު ދުވަހު ހޮންގް ކޮންގްގެ ކެލްބީ ސްނެކްސް ފެކްޓްރީއަށް ގެންދިޔަ އަލުވި ޝިޕްމަންޓުން ފެނުނު ބޮން މިހާރު ވަނީ ރައްކާތެރިކަމާއިއެކު ގޮއްވާލާފައެވެ.

ހޮންގް ކޮންގް ފުލުހުންގެ ސުޕްރިންޓެންޑެންޓެއް ކަމުގައިވާ ވިލްފްރެޑް ވޮންގ ހޯ-ހޮން މީޑިއާގައި ވިދާޅުވީ، ގަރުނަކަށްވުރެ ގިނަދުވަސް ވެފައިވާ މި އަތުބޮން ފެނުނު އިރު އެ ބޮން އޮތީ ކުރިން ޑިސްޗާޖްވެ، ނަމަވެސް ނުގޮވައި، ނުރައްކާތެރި ހާލަތެއްގައި ކަމަށެވެ. އޭނާ ވިދާޅުވީ، ރައްކާތެރިކަމާއި އެކު ބޮން ގޮއްވާލާފައިވަނީ ބޮން ފެނުނު ފެކްޓްރީ ތެރޭގައި ކަމަށެވެ.

އޭނާ ވިދާޅުވީ، އެ ބޮމުގެ ބަރުދަނުގައި 1 ކިލޯ ހުރި ކަމަށާއި، މިހާތަނަށް ބެލިބެލުމުން އެއީ އަލުވިތަކާއިއެކު އިމްޕޯޓް ކުރެވިފައިވާ ބޮމެއްކަން ހާމަވެފައިވާ ކަމަށެވެ.

ބެލެވޭ ގޮތުގައި މި ބޮމަކީ ފުރަތަމަ ބޮޑު ހަނގުރާމަ ނިމުނު އިރު އެ ހަނގުރާމައިގައި ސިފައިން ފިލައި ތިބުމަށް ކޮނުނު ވަޅެއްގެ ތެރޭގައި ބޭނުން ނުކޮށް އޮތް ބޮމެކެވެ. ފުރަތަމަ ބޮޑު ހަނގުރާމަ ކުރެވުނު ބައެއް ސަރަޙައްދުތަކުގައި ހުރި އެފަދަ ވަޅުތަކަށް ފަސް އަޅައި، އޭގެން ބައެއް ސަރަޙައްދުތަކަކީ މިހާރު ދަނޑުވެރިކަމަށް ބޭނުންކުރާ ބިން ކަމުން، މިއީ އެއިން ދަނޑަކުން އަލުވި ނެގިއިރު އަލުތްވާއެކު ނެގިފައި އޮތް ބޮމެއް ކަމަށް ބެލެވެއެވެ.

ކުރީގެ އެކި ހަނގުރާމަތަކުގައި ބޭނުން ނުކޮށް އެކި ތަންތަނަށް ދޫކޮށްލާފައި ހުރި މިފަދަ ހަތިޔާރާއި، އަދި ޚާއްސަކޮށް އެކި ޒާތުގެ ބޮން ފެނުމަކީ އާންމު ކަމެކެވެ. އަދި އެގޮތަށް ފެންމަ ބައެއް ހަތިޔާރު ނުރައްކާތެރި ހާލަތެއްގައި ހުރި ނަމަވެސް، ގިނަ ތަކެތި ފެނުނު އިރު ހުރީ ރައްކާތެރި ހާލަތުގައެވެ.