މި ސަރުކާރަކީ ރައްޔިތުންގެ ބޮޑެތި ގުރުބާނީތަކަކާއި، ގިނަ އުއްމީދުތަކަކާއިއެކު ގެނައި ސަރުކާރެއްކަމަށާއި، ސަރުކާރު ދެމެހެއްޓުމުގެ މަސައްކަތްކުރަންޖެހެނީ ރައްޔިތުންގެ އުއްމީދުތައް ނުގެއްލޭނެ ގޮތަކަށް ކަމަށް އަދާލަތު ޕާޓީގެ އިލްމްވެރިންގެ މަޖިލީހުގެ ރައީސް އައްޝެއިހް އިލްޔާސް ހުސެއިން ވިދާޅުވެއްޖެ އެވެ.
ސަރުކާރު ކޯލިޝަންގެ ތެރޭގައި ބޮޑެތި ހިޔާލު ތަފަތުވުންތަކާއެކު، ދެ ބަސްވުންތަކެއް ހުރިކަމުގެ އަޑުތައް ގަދަވެފައިވާއިރު، އާދިއްތަ ދުވަހު ޝެއިހް އިލްޔާސް ކުރެއްވި ޓުވީޓެއްގައި ވިދާޅުވީ މި ސަރުކާރަކީ ހަމައެކަނި ހަތަރު ލީޑަރުންގެ ގުރުބާނީއަކުން ގެނައި ސަރުކާރެއް ނޫން ކަމަށެވެ. އަދި މި ސަރުކާރަކީ ދިވެހި ރައްޔިތުންގެ ބޮޑެތި އުއްމީދުތަކަކާއި، ގުރުބާނީތަކަކާއެކު ގެނައި ސަރުކާރެއްކަމަށް ވިދާޅުވެ، އެކަން ހަދާންކޮށްދޭ ކަމަށް ޝެއިހް އިލްޔާސް ވިދާޅުވެފައިވެއެވެ.
އެހެންކަމުން އިސްލާމް ދީނާއި، ޤައުމުގެ އިސްތިގްލާލަށް އަދި ރައްޔިތުންގެ ގުރުބާނީތަކާ އުއްމީދުތައް ގެއްލިގެން ނުދާފަދަ ގޮތަކަށް 4 ލީޑަރުން ސަރުކާރު ދަމަހައްޓަން މަސައްކަތް ކުރަންޖެހޭ ކަމަށް ޝެއިހް ވިދާޅުވި އެވެ. އަދި ވިދާޅުވީ ސަރުކާރު ދަމަހައްޓަން މަސައްކަތް ކުރަންޖެހޭ މި ވަގުތަކީ ޒާތީ މަސްލަހަތަށް ވުރެ، ޤައުމީ މަސްލަހަތު އިސްކުރަންޖެހޭ ވަގުތުކަމަށެވެ.
v ma islam dheenashai gaumuge isthigulalashai adhi rayyithunge gurubaneethakai ummeedhuthah gelligen nudhafadha gothakah 4 leaderun sarukaru dhamahattan masakkah kuran jehey mivaguthakee zaathee maslahathvvure gaumee maslahathu is kuran jehey vaguthekkanves handhankodhen
— Ilyas Hussain (@ilyaasipa) February 3, 2019
ސަރުކާރު ކޯލިޝަންގެ ތެރޭގައި ދެބަސްވުންތައް އުފެދިފައިވަނީ ރައްޔިތުންގެ މަޖިލީހުގެ އިންތިހާބަށް ޕާޓީތަކުން ޓިކެޓްދޭން ގޮތެއް ކަނޑަނޭޅުމާއި ގުޅިގެންނެވެ. މިހާރު ޕާޓީތަކުން އިންިތހާބަށް ނިކުތުމަށް ނިންމާފައިވަނީ ވަކިވަކިންނެވެ.
ރައީސް އޮފީހުގައި އެންމެފަހުން ބޭއްވި ނޫސްވެރިންގެ ބައްދަލުވުމުގައި ރައީސް އިބްރާހިމް މުހައްމަދު ސޯލިހް ވިދާޅުވީ ކޯލިޝަންގެ ތެރޭގައި ބައެއް ހިޔާލު ތަފާތުވުންތައް ހުރިނަމަވެސް، ކޯލިޝަން ރޫޅި، ބައިބައިނުވާނެ ކަމަށެވެ. އަދި ހުރި ހިޔާލު ތަފަތުވުންތައް ހައްލުކުރުމަށް މަސައްކަތް ކުރަމުންދާކަމަށް އެމަނިކުފާނު ވިދާޅުވި އެވެ.
