މިނިވަން ދުވަހުގެ ރަސްމިއްޔާތު ފޮންސެކާ ބޮއިކޮޓް ކުރަނީ

އަވަށްޓެރި ސްރީ ލަންކާގެ 71 ވަނަ މިނިވަން ދުވަސް ފާހަގަ ކުރުމުގެ ގޮތުން އެ ގައުމުގެ ވެރިރަށް ކޮލަމްބޯގެ ގޯލް ފޭސްގައި މި މަހުގެ ހަތަރު ވަނަ ދުވަހު ބާއްވާ ރަސްމިއްޔާތު ބޮއިކޮޓް ކުރާނެ ކަމަށް ކުރީގެ އާމީ ޗީފް ސަރަތު ފޮންސެކާ ވިދާޅުވެއްޖެއެވެ.

ލަންކާގެ ޑެއިލީ މިރާ އަށް ދެއްވި އިންޓަވިއުއެއްގައި ފޮންސެކާ ވިދާޅުވީ، އޭނާ އަށް އެ ރަސްމިއްޔާގެ ދައުވަތު ބުރާސްފަތި ދުވަހާއި ހަމަޔަށް ލިބިވަޑައިގެންފައި ނުވާ ކަމަށެވެ.

އާމީ ޗީފް ފަދަ މަތީ މަގާމެއް އަދާކޮށްފައިވާ ބޭފުޅަކަށް އެކަށީގެންވާ ވަރަށް އިއްޒަތާއި ގަދަރު ސަރުކާރުން ނުދޭ ކަމަށާއި، އަދި އޭނާގެ ނަޒަރުގައި އެފަދަ ރަސްމިއްޔާތެއްގައި ބައިވެރިވެވަޑައިގަތުމަކީ އެންމެ އެކަށީގެންވާ ކަމެއް ނޫނެވެ.

ފޮންސެކާ ވަނީ ސްރީ ލަންކާގެ ސިފައިންގެ ހިދުމަތުގައި ގިނަ އަހަރު ތަކެއް ހޭދަ ކުރައްވާފަ އެވެ. އޭގެ ތެރޭގައި ސްރީ ލަންކާ ސިފައިންގެ ކޮމާންޑަރު ކަމާއި، ޗީފް އޮފް ޑިފެންސްގެ މަގާމު ހިމެނެއެވެ.

މިނިވަން ދުވަހުގެ ރަސްމިއްޔާތުގެ ފަރިތަކުރުންތައް ބުރާސްފަތި ދުވަހު ގޯލް ފޭސް ގައި ބާއްވާފައިވާއިރު ހަފްލާގައި ބައިވެރިވެ ވަޑައިގަންނަވާނެ އިއްޒަތްތެރިންގެ ލިސްޓު ވަނީ އިއުލާން ކޮށްފައެވެ.

މި ރަސްމިއްޔާތު ޝަރަފްވެރި ކޮށްދެއްވާނީ ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ.

ސްރީ ލަންކާގެ ގައުމީ ދުވަހުގެ މުނާސަބަތުގައި އިނގިރޭސި ރާނީ އެލިޒަބަތު ވަނީ ލަންކާގެ ރައީސް މައިތިރިޕާލާ ސިރިސޭނާ އަށް މަރުހަބާގެ މެސެޖެއް ފޮނުވާފައެވެ. އެ މެސެޖްގައި ރާނީ ވަނީ އެކަމަނާގެ ފަރާތުން ލަންކާގެ ރައްޔިތުންނަށް ބާއްޖަވެރި އަދި ފާގަތި ދުވަސްތަކަކަށް އެދިފައެވެ.

އިނގިރޭސިންގެ އިސްތުމާރުގެ ދަށުގައި 133 އަހަރު ވަންދެން އޮތުމަށް ފަހު ލަންކާ އަށް މިނިވަން ކަން ލިބިފައި ވަނީ 1948 ވަނަ އަހަރު ފެބްރުއަރީ މަހުގެ ހަތަރު ވަނަ ދުވަހުއެވެ.