ރާއްޖެޓީވީގެ މައްސަލާގައި އެމްއެމްސީއިން ނިންމި ނިންމުން ރަނގަޅު: ސިވިލް ކޯޓް
31 ޖެނުއަރީ 2019 | ބުރާސްފަތި 18:04މައްސަލަ ކުރިއަށް ގެންދިޔައިރު ރާއްޖޭޓީވީއަށް ނިސްބަތްވާ އެމްއެމްސީގެ މެންބަރުގެ ބަހާއި ވޯޓު ނުހިމަނާ
ނޫސްވެރިކަމުގެ އެވޯޑް ދިނުމުގެ ހަފްލާގައި ރާއްޖެޓީވީގެ ނޫސްވެރިން ހިމޭން އިޙުތިޖާޖެއް ކުރަނީ
ނޫސްވެރިކަމުގެ އެވޯޑް ދިނުމަށް 2017 ވަނަ އަހަރު ބޭއްވި ހަފްލާގައި ރާއްޖެޓީވީ ނޫސްވެރިން 'އަބުރުފުޅު ފަންޑު' ހިފައިގެން ތިބި މައްސަލަ މޯލްޑިވްސް މީޑިއާ ކައުންސިލުން ނިންމީ ރަނގަޅަށް ކަމަށް ސިވިލް ކޯޓުން ޙުކުމްކޮށްފިއެވެ.
އެމްއެމްސީއަށް މިމައްސަލަ ހުށަހެޅުމުން، އެމައްސަލަ ނުބެލުމަށް މެންބަރުންގެ އިއްތިފާގުން ވަނީ ނިންމާފައެވެ. އަދި މިނިންމުން ނިންމީ މެންބަރުންގެ މެދުގައި ނެގި ސިއްރު ވޯޓަކުންނެވެ. ނަމަވެސް މިކަމާއި ގުޅިގެން ދެކެވުނު ވާހަކައިގައިވެސް އަދި އެއަށްފަހު ނެގި ވޯޓުގައިވެސް އެމްއެމްސީގެ މެންބަރުކަން ކުރައްވާ ރާއްޖެޓީވީގެ ނިއުސް ޑައިރެކްޓަރު އަލީ ޔޫސުފްގެ ބަހާއި ވޯޓު ހިމަނާފައެއް ނުވެއެވެ.
ސިވިލް ކޯޓަށް މިމައްސަލަ ހުށައެޅުމާއި ގުޅިގެން ބުރާސްފަތި ނެރުނު ހުކުމްގައި ބުނީ މިމައްސަލާގެ ނިންމުން ނިންމާފައިވަނީ މޯލްޑިވްސް މީޑިއާ ކައުންސިލުގެ ގާނޫނު ގެ 16 ވަނަ މާއްދާގެ 5 ވަނަ ނަންބަރާއި، އެމާއްދާގެ (ށ) އަދި (ނ) އާއި މޯލްޑިވްސް މީޑިއާ ކައުންސިލުގެ ގަވާއިދުގެ 32 ވަނަ މާއްދާ އަދި އެމްއެމްސީގެ ބައްދަލުވުންތައް ގެންދާ އުސޫލުތަކާވެސް އެއްގޮތަށްކަން ހުށަހެޅިފައިވާ ލިޔުންތަކުން ޝަރީއަތަށް ސާބިތުވާ ކަމަށެވެ.
ސިވިލްކޯޓުގެ ގާޒީ އަލީ އަބްދުﷲ ކުރެއްވި މިހުކުމުގައި ބުނެފައިވަނީ މީޑިއާ ކައުންސިލުން 18 އޮކްޓޫބަރު 2017 ގައި ކައުންސިލް ޖަލްސާގައި ނިންމާފައިވާ ނިންމެވުމަކީ ބާތިލް ނިންމެވުމެއް ކަމަށް ކަނޑައަޅާނެ ޝަރުއީ އަދި ގާނޫނީ ހަމައެއް ނެތް ކަމަށެވެ.
