ސަސްޕެންޑްކުރި ކައުންސިލަރުންނަށް ގެއްލިގެން ދިޔަ މުސާރަ ދޭން ނިންމައިފި
31 ޖެނުއަރީ 2019 | ބުރާސްފަތި 03:03މިއީ ސަރުކާރުން ލާމަރުކަޒީ ނިޒާމަށް އިސްކަންދޭ ކަމުގެ ހެއްކެއް
އެލްޖީއޭގެ ބޯޑްގެ ބައްދަލުވުމުގެ ތެރެއިން
ކުރީގެ ރައީސް އަބްދުﷲ ޔާމީންގެ ވެރިކަމުގައި ސަސްޕެންޑްކުރި ކައުންސިލަރުންނަށް އެ ސަސްޕެންޝަނުގެ މުއްދަތުގައި ގެއްލިގެން ދިޔަ މުސާރަ ދިނުމަށް ލޯކަލް ގަވަމަންޓް އޮތޯރިޓީ، އެލްޖީއޭއިން ނިންމައިފިއެވެ.
ހޯމް މިނިސްޓަރު އަދި އެލްޖީއޭގެ ރައީސް އިމްރާން އަބްދުﷲ ކުރެއްވި ޓްވީޓެއްގައި ވިދާޅުވީ ކައުންސިލަރުންނަށް އަޅާފައިވާ ފިޔަވަޅުތައް ލުއިކޮށްދީ، ހައްގުތައް އިޔާދަކުރުމަށް ނިންމާފައިވާ ކަމަށެވެ. އަދި ވިދާޅުވީ މިނިންމުމާމެދު އުފާކުރާ ކަމަށާއި، މިއީ މި ސަރުކާރުން ލާމަރުކަޒީ ނިޒާމަށް އިސްކަންދޭ ކަމުގެ ހެއްކެއް ކަމަށެވެ.
އެލްޖީއޭއިން ބުނީ ކައުންސިލްތަކުގެ މި ހިނގާ ތިން ވަނަ ދައުރުގައި ފިޔަވަޅުއަޅާ ސަސްޕެންޑް ކުރެވުނު ކައުންސިލަރުންގެ މައްސަލަތައް މުރާޖަޢާކުރުމަށް ނެގުނު ކުޑަ ކޮމެޓީގެ ލަފަޔާއި އެއްގޮތަށް، ކައުންސިލަރުންނަށް ގެއްލިގެންދިޔަ މުސާރަ އަލުން އަނބުރާ ދިނުމަށް އެލްޖީއޭގެ ބޯޑުން ނިންމީ ބުދަ ދުވަހު ކަމަށެވެ.
އެންމެ ކައުންސިލަރެއް ފިޔަވައި ދެން ސަސްޕެންޑްކުރި ހުރިހާ ކައުންސިލަރުންގެ ވެސް ސަސްޕެންޝަންގެ މުއްދަތުގައި ލިބެންޖެހޭ މުސާރަ އަނބުރާ ދިނުމަށް އެލްޖީއޭއިން ވަނީ ނިންމާފައެވެ. މިހާރު ހިނގަމުންދާ ތިން ވަނަ ދައުރުގެ ގިނަ ކައުންސިލަރުންތަކެއް ކުރީގެ ރައީސް ޔާމީންގެ ވެރިކަމުގައި، އެލްޖީއޭއިން ސަސްޕެންޑް ކުރިއެވެ.
