ބާސާގެ އާ އެއްބަސްވުން އަލްބާ ގަބޫލުކޮށްފި

ބާސެލޯނާ އިން ހުށަހެޅި އާ އެއްބަސްވުން އެ ކްލަބަށް ކުޅެމުން އަންނަ ސްޕެއިންގެ ލެފްޓް ބެކް ޖޯޑީ އަލްބާ ގަބޫލުކޮށްފި ކަމަށް ރިޕޯޓްތައް ބުނެފިއެވެ.

ސްޕެއިންގެ ބައެއް މީޑިއާތަކުން ބުނީ، ބާސާއާ އެކު އަލްބާ ހަދާފައިވާ އެއްބަސްވުން 2024 ވަނަ އަހަރަށް އާކުރަން ނިންމާފައިވާ ކަމަށާއި، އެ އެއްބަސްވުމުގައި ވަރަށް އަވަހަށް ސޮއިކުރާނެ ކަމަށެވެ.

ދާދި ފަހުން ނޫސްވެރިންނަށް މައުލޫމާތު ދެމުން އަލްބާ ވަނީ އޭނާ ބާސާގައި މަޑުކުރަން ބޭނުންވާ ވާހަކަ ބުނެފައެވެ. ނަމަވެސް އެއްބަސްވުން އާނުކުރެވި ލަސްވީ ބައެއް އޭރު ހެދި އެއްބަސްވުމުގައި ހިތްހަމަނުޖެހޭ ކަންކަން ހުރުމުންނެވެ.

ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ އަލްބާ ހޯދަން މަސައްކަތް ކުރަމުންނެވެ. އޭގެ ތެރޭގައި ޕްރިމިއާ ލީގު އަދި އިޓަލީ ލީގުގެ ބައެއް ކްލަބްތައް ވެސް ހިމެނެއެވެ.

ސްޕެއިންގެ ވެލެންސިއާ އިން ވިދާލި އަލްބާ ވަނީ އެ ޓީމަށް ކުޅުނު 110 މެޗުގައި ހަ ލަނޑު ކާމިޔާބުކޮށްފައެވެ. އޭނާ ވެލެންސިއާގައި ތިން ސީޒަން ހޭދަކުރުމަށް ފަހު ބާސާއަށް ބަދަލުވީ 2012 ވަނަ އަހަރުގެ ސީޒަނުގައެވެ.

އަލްބާ ވަނީ ބާސާއަށް މިހާތަނަށް ކުޅުނު 271 މެޗުގައި 14 ލަނޑު ކާމިޔާބުކޮށް، އެޓީމާއެކު ހަތަރު ލީގު ތަށި، ހަތަރު ކޮޕާޑެލްރޭ، ތިން ސްޕެނިޝް ސުޕާކަޕް، އެއް ޔުއެފާ ޗެމްޕިއަންސް ލީގު އަދި އެއް ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.

ސްޕެއިން ގައުމީ ޓީމަށް ކުޅުނު 67 މެޗުގައި 8 ލަނޑު ކާމިޔާބުކޮށްފައިވާ އަލްބާ ވަނީ 2012 ވަނަ އަހަރު އެޓީމާއެކު ކާމިޔާބުކުރުމުގެ އިތުރުން 2013 ވަނަ އަހަރު ފީފާ ކޮންފެޑެރޭޝަންސް ކަޕްގެ ދެވަނަ ވެސް ހޯދާފައެވެ.