ދުންފަތުގެ ބާވަތްތަކުގެ ބޭރުގައި މަންޒަރު ހިމެނޭ ސިއްޙީ އިންޒާރު ޖެހުމަށާއި، ވަކި ސިނގިރޭޓް ވިއްކުން ހުއްޓާލުމަށް ޤަވާޢިދު އެކުލަވާލައި، ޤާނޫނީ އިޖްރާޢަތްތައް ފުރިހަމަކޮށްފިއެވެ.

ދުންފަތް، ސުޕާރީ، އެނަރޖީ ބުއިންތައް އަދި ހަކުރު ގިނަ ބުއިންތައް ފަދަ ސިއްޙަތަށް ރަނގަޅު ނޫން ބާވަތްތަކުން ދުރުވުމަށް އާންމުން ހޭލުންތެރިކުރުމަށް ސަރުކާރުން ކުރުމަށް ރާވާފައިވާ މަސައްކަތްތަކުގެ ތެރެއިން، "ދުންފަތުގެ ބާވަތްތައް ޕެކެޓްކޮށް ލޭބަލް ޖެހުމާ ބެހޭ ޤަވާޢިދު" ތަންފީޒު ކުރުމަށް ވަޒީރުންގެ މަޖިލީހުން ރައީސުލްޖުމްހޫރިއްޔާއަށް ވަނީ ލަފާއަރުވާފައެވެ. މިކަމަށް ލަފާ އަރުވާފައި ވަނީ އަންގާރަ ބޭއްވި ބައްދަލުވުމުގައި މިނިސްޓްރީ އޮފް ހެލްތް އިން ހުށަހެޅި ކަރުދާހުގެ މައްޗަށް މަޝްވަރާ ކުރުމަށް ފަހުގައެވެ.

ދުންފަތުގެ ނުރައްކަލާ މެދު އާންމުން ހޭލުންތެރިކުރުމަކީ ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދުމަށް ކަނޑައަޅާފައިވާ ވައުދެކެވެ. އަދި، ދުންފަތުގެ ބާވަތްތަކުގައި ތަސްވީރުން ދެވޭ ސިއްޙަތުގެ އިންޒާރު ޖެހުން ލާޒިމު ކުރުމާއި، ދުންފަތުގެ ބާވަތްތައް ވިއްކޭނެ އެންމެ މަދު މިންވަރު ކަނޑައެޅުމަކީ ދުންފަތް ކޮންޓްރޯލް ކުރުމާ ބެހޭ ޤާނޫނާއި، ދުންފަތް ކޮންޓްރޯލް ކުރުމާ ބެހޭ ބައިނަލްއަޤުވާމީ މުޢާހަދާ ލާޒިމު ކުރާ ކަންކަމެވެ.

މިދިޔަ ޑިސެމްބަރު މަހު ނައިބު ރައީސް ފައިސަލް ނަސީމް ވަނީ ސިއްހަތަށް ރަނގަޅުނޫން ކާނާ (ދުންފަތް، ސުޕާރީ، އެނާޖީ ޑްރިންކް އަދި ހަކުރު ގިނައިން އެކުލެވޭ ކާނާ) އިޝްތިހާރު ކުރުން ހުއްޓާލަން ގޮވާލައްވާފައެވެ. އަދި މި ހަރަކާތަށް އެއްބާރުލުން ދިނުމުގެ ގޮތުން ނައިބު ރައީސް ވަނީ އެނާޖީ ޑްރިންކް ބޭނުންކުރެއްވުން ހުއްޓަވާލައްވާނެ ކަން އިއުލާން ކުރައްވާފައެވެ.