ޔާމީންގެ ސަރުކާރުން ކައުންސިލަރުންނާ މެދު އެޅި ފިޔަވަޅުތައް މުރާޖާ ކުރަނީ
ކައުންސިލްތަކަށް ބާރުތައް ދޭން ވަނީ ފަށާފައި
ކައުންސިލްތަކުން އަތުލާފައިވާ ބާރުތައް އަލުން ކައުންސިލްތަކަށް ދިނުމަކީ ރައީސް ސޯލިހުގެ ސަރުކާރުގެ ފުރަތަމަ 100 ދުވަހުގެ ވައުދެއް
ކުރީގެ ރައީސް އަބްދުﷲ ޔާމީންގެ ސަރުކާރުން ކައުންސިލަރުންނާ މެދު އަޅާފައިވާ ފިޔަވަޅުތައް އަލުން މުރާޖާ ކުރަމުންދާ ކަމަށް ހޯމް މިނިސްޓަރު އަދި ލޯކަލް ގަވަރުމަންޓް އޮތޯރިޓީ (އެލްޖީއޭ)ގެ ރައީސް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން ހޯމަ ދުވަހުގެ ރޭ ކުރެއްވި ޓްވީޓެއްގައި ވިދާޅުވީ ކައުންސިލަރުންނާއި މެދު އަޅާފައިވާ ނުހައްގު ފިޔަވަޅުތައް މުރާޖާކުރަން ފަށްޓަވާފައިވާ ކަމަށެވެ. އަދި ދާދި އަވަހަށް އެ މައްސަލަތައް ނިމި އިންސާފު ގާއިމްވެގެން ދާނެ ކަމަށް ވިދާޅުވިއެވެ. އަދި ސިޔާސީ ސަބަބުތަކާ ހުރެ ކައުންސިލަރުންނާމެދު ފިޔަވަޅު އެޅުމަކީ ރައީސް އިބްރާހީމް މުހައްމަދު ސޯލިހުގެ ސަރުކާރުން ކުރާނެ ކަމެއް ނޫން ކަމަށް ވެސް މިނިސްޓަރު ވިދާޅުވިއެވެ.
ސިޔާސީ އެކި ސަބަބުތަކާއި، ހިޔާލު ތަފާތުވުންތަކާއި ގުޅިގެން ކުރީގެ ސަރުކާރުން ވަނީ ގިނަ އަދަދެއްގެ ކައުންސިލަރުންނާއި، ކައުންސިލްތައް ވެސް ސަސްޕެންޑް ކޮށްފައެވެ.
ކައުންސިލްތައް ބާރުވެރިކޮށް، ކައުންސިލްތަކުން ނަގާފައިވާ ބާރުތައް ސަރުކާރުން މިހާރު ވަނީ ދޭން ފަށާފައެވެ.
ކައުންސިލްތަކުން އަތުލާފައިވާ ބާރުތައް އަލުން ކައުންސިލްތަކަށް ދިނުމަކީ ރައީސް ސޯލިހުގެ ސަރުކާރުގެ ފުރަތަމަ 100 ދުވަހުގެ ތެރޭގައި ކުރަން އަމާޒުކޮށްފައިވާ ކަންތައްތަކުގެ ތެރޭގައި ހިމެނޭ ކަމެކެވެ. މީގެ އިތުރުުން ކައުންސިލްތައް ބާރުވެރި ކުރުވައި، ކައުންސިލްތަކަށް އާމްދަނީ ލިބޭނެ ގޮތް ތަނަވަސްކޮށްދިނުމަކީ ރައީސް ސޯލިހުގެ ރިޔާސީ ވައުދުފުޅެކެވެ.
ކައުންސިލްތަކުގެ އިހްތިޞާސްގެ ތެރޭގައި ހިމެނޭ ތަންތަނުން ކުލީގެ ގޮތުގައި ލިބޭ އާމްދަނީގެ 40 ޕަސެންޓް ކައުންސިލްތަކަށް ލިބޭ ގޮތަށް ލާމަރުކަޒީ ގާނޫނު ބަދަލު ކުރަން ސަރުކާރު ހިންގާ މައި ޕާޓީ، އެމްޑީޕީން ވެސް ވަނީ އަމާޒު ހިފައިފާފައެވެ.
