ދުވާލަކަށް އެންމެ ކުޑަކޮށް ދެވޭ އުޖޫރައަކަށް 200 ރުފިޔާ
28 ޖެނުއަރީ 2019 | ހޯމަ 07:06އުޖޫރަ ދެވޭނެ އުޞޫލު ކަނޑައަޅާނީ އެކި މަސައްކަތްތަކަށް އެކި އުޖޫރަ ކަނޑައަޅާ އުޞޫލުން
ޓީޗަރުންތަކެއް ތަމްރީން ފްރޮގްރާމެއްގައި
ދުވާލަކަށް އެންމެ ކުޑަކޮށް ދޭވޭ އުޖޫރައަކަށް 200 ރުފިޔާ ދޭން ޖެހޭ ގޮތަށް ޤާނޫނެއް ހުށަހެޅުމަށް އެމްޑީޕީން ނިންމައިފި އެވެ.
މި ގާނޫނު ހުށަހަޅާނީ އަލަށް އިންތިޚާބުކުރާ މަޖިލީހަށެވެ.
ހޮނިހިރު ދުވަހު ހުޅުމާލެ ބްރައިޓް ވޭ އިންޓަނޭޝަނަލް ސްކޫލްގައި އެމްޑީޕީން ބޭއްވި ވޯކްޝޮޕްގައި އެ ބިލްގެ ޑްރާފްޓެއް ވަނީ ހުށައަޅާފަ އެވެ. ވަޒީފާއާ ބެހޭ ޤާނޫނު އިން އެންމެ ކުޑަމިނުން ދެވޭނޭ އުޖޫރަ ކަނޑައެޅުމުގެ ބާރު ސަރުކާރަށް ވަނީ ދީފައެވެ.
އެމްޑީޕީން ބުނީ އެޖެންޑާ 19 ގައި (ވަޒީފާއާ ބެހޭ ޤާނޫނު) އަށް 6 ވަނަ އިޞްލާޙު ގެނައުމުގެ ޤާނޫނު އިން އެންމެ ކުޑަމިނުން ދެވޭނެ އުޖޫރަ ކަނޑައެޅޭނެ ކަމަށެވެ.
އެންމެ ކުޑަ އުޖޫރަ ދެވޭނެ އުޞޫލު ކަނޑައަޅާނީ އެކި މަސައްކަތްތަކަށް އެކި އުޖޫރަ ކަނޑައަޅާ އުޞޫލުން ކަމަށެވެ. އަދި އެގޮތުން އުޖޫރަ ކަނޑައަޅާނީ މަހު އުޖޫރައިން ދުވަހަކަށް ޖެހޭ ޢަދަދުން ކަމަށް އެބިލްގައިވެއެވެ.
އެކި ސިނާޢަތްތަކުގައި މަސައްކަތް ކުރާ އެކި ފަންނުގެ މަސައްކަތްތެރީންނަށް އުޖޫރަ ކަނޑައަޅާއިރު ބަލާނީ އެ ސިނާޢަތަކަށް ކަނޑައަޅާފައިވާ އެންމެ ކުޑަ އުޖޫރައަށެވެ. އުޖޫރައިގެ ގޮތުގައި ދެވޭ އެންމެ ކުޑަ ޢަދަދު ދާއިމީ ވަޒީފާ އާއި ވަގުތީ ވަޒީފާ އަދާކުރާ މުވައްޒަފުންނަށް ވެސް ކަނޑައެޅޭނެއެވެ.
އެންމެ ކުޑަ އުޖޫރަ ކަނޑައަޅާނެ ޢަދަދުގެ ތެރޭގައި ދަތުރުފަތުރުގެ ސިނާޢަތަށް ދުވާލަކަށް 266.27 ރުފިޔާ، މަސްވެރިކަމާ ދަނޑުވެރިކަމުގެ ސިނާޢަތަށް ދުވާލަކަށް 266.67 ރުފިޔާ، ކޮންސްޓްރަކްޝަން މަސައްކަތުގެ ސިނާޢަތު ދުވާލަކަށް 200.00 ރުފިޔާ، ރިސޯޓްފަހަރު ހިންގުމުގެ ސިނާޢަތު ދުވާލަކަށް 333.33 ރުފިޔާ، ފަތުރުވެރިކަމުގެ އެހެނިހެން ސިނާޢަތު ދުވާލަކަށް 200.00 ރުފިޔާ، ސިއްޙީ ޚިދުމަތް ދިނުން ދުވާލަކަށް 266.67 ރުފިޔާގެ އިތުރުން، ތަޢުލީމީ ޚިދުމަތްދިނުން ދުވާލަކަށް 266.67 ރުފިޔާ، އަދި އެހެނިހެން ސިނާޢަތްތަކާއި ޚިދުމަތްތަކަށް ދުވާލަކަށް 200.00 ރުފިޔާ ވަނީ ހަމަ ޖައްސާފައެވެ.
