ގަވަރނިން ކައުންސިލް ބައްދަލުވުމުގައި ބައިވެރިވެވަޑައިގަތުމަށް ޝާހިދު އިނގިރޭސިވިލާތުގައި!
27 ޖެނުއަރީ 2019 | އާދީއްތަ 08:49ޝާހިދު ވަނީ އދ.ގެ ސެކެރަޓަރީ ޖެނެރަލްއާ ބައްދަލުކުރައްވާފައި
ފޮރިން މިނިސްޓަރ އަބްދުﷲ ޝާހިދު
އިނގިރޭސިވިލާތުގައި ބާއްވާ ކޮމިއުނިޓީ އޮފް ޑިމޮކްރަސީސްގެ ގަވަރނިން ކައުންސިލް ބައްދަލުވުމުގައި ބައިވެރިވެ ވަޑައިގަތުމަށް ފޮރިން މިނިސްޓަރ އަބްދުﷲ ޝާހިދު ލަންޑަނަށް ވަޑައިގެންފިއެވެ.
ފޮރިން މިނިސްޓަރުގެ މި ދަތުރުފުޅުގައި އިނގިރޭސިވިލާތުގެ ސަރުކާރުގެ އޮފިޝަލުންގެ އިތުރުން ކޮމަންވެލްތްގެ ސެކްރެޓަރީ ޖެނެރަލް ބައްދަލުކުރައްވާނެ ކަމަށް ފޮރިން މިނިސްޓްރީން މައުލޫމާތުދެއެވެ.
މިނިސްޓަރު ޝާހިދު ހޮނިހިރު ދުވަހު ހަވީރު އިނގިރޭސިވިލާތަށް ވަޑައިގަތުމުގެ ކުރިން ވަނީ މޫސުމަށް އަންނަ ބަދަލުތަކާއި ބެހޭ ގޮތުން އދ.ގެ ސަލާމަތީ މަޖިލީހުގައި ތަގްރީރުކުރައްވާފައެވެ. އޭގެ އިތުރުން ސަލާމަތި މަޖިލީހުގައި ބައިވެރިވި ގައުމުތަކުގެ އިސްވެރިންނާއި ވެސް ބައްދަލުކުރެއްވެވި އެވެ.
މިނިސްޓަރު ވަނީ، ނޯވޭގެ ޑެޕިއުޓީ މިނިސްޓަރާއި، އިންޑިއާއިން އެމެރިކާ އަށް ކަނޑައަޅުއްވާފައިވާ ސަފީރު ސައިދް އަކްބަރުއްދީންގެ އިތުރުން އިންޑޮނޭޝިއާގެ ފޮރިން މިނިސްޓަރު ރެތްނޯ މަރްސުދީއާ ވެސް ބައްދަލުކުރައްވާފައެވެ. އެބައްދަލުވުމުގައި ދެ ގައުމުގެ ގުޅުން އިތުރަށް ބަދަހި ކުރުމާއި ބެހޭ ގޮތުން މަޝްވަރާތަކެއް ކުރެވިފައިވާ ކަމަށް ފޮރިން މިނިސްޓްރީން މައުލޫމާތުދެއެވެ. އަދި ޝާހިދު ވަނީ އދ.ގެ ސެކެރަޓަރީ ޖެނެރަލް އެންޓޯނިއޯ ގުޓަރޭސްއާ ބައްދަލުކުރައްވާފައެވެ.
މުސޫމަށް އަންނަ ބަދަލުތަކާއި ބެހޭ ގޮތުން އދ. އިން ކުރާ މަސައްކަތުގައި ރާއްޖޭގެ އެއްބާރުލުން ލިބޭނެ ކަމުގެ ޔަގީން ކަން ޝާހިދު ވަނީ ސެކްރެޓެރީ ޖެނެރަލް އަށް ދެއްވާފައެވެ.
ރަސްމީ ދަތުރުފުޅު ނިންމަވާލެއްވުމަށް ފަހު ފޮރިން މިނިސްޓަރު މާލެ ވަޑައިގަންނަވާނީ އަންނަ ހަފްތާގައި ކަމަށް ފޮރިން މިނިސްޓްރީން މައުލޫމާތުދެއެވެ.
