ވެނެޒުއޭލާގައި ރިޔާސީ އިންތިހާބެއް ބާއްވަން ޔޫރަޕުގެ ގައުމުތަކުން މުހުލަތެއް ދީފި

އަށް ދުވަހުގެ ތެރޭގައި ވެނެޒުއޭލާގައި ރިޔާސީ އިންތިހާބެއް ނުބޭއްވިއްޖެ ހާލަތެއްގައި އިދިކޮޅު ލީޑަރު ހުއާން ގައިޑޯއަކީ ރައީސްކަމުގައި ބަލައިގަންނާނެ ކަމުގެ އިންޒާރު ޔޫރަޕުގެ ގައުމުތައް ކަމުގައިވާ ސްޕެއިން، ފަރަންސޭސިވިލާތް އަދި ޖަރުމަނުން މިހާރުގެ ރައީސް ނިކޮލަސް މަޑޫރޯއަށް ދީފިއެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް ގައުމާ މުހާތަބުކޮށް ދެއްކެވި ވާހަކަފުޅުގައި ވިދާޅުވީ އަށް ދުވަހުގެ ތެރާގައި އިންސާފުވެރި، ދެފުށް ފެންނަ އިންތިހާބެއް ނުބޭއްވިއްޖެ ހާލަތެއްގައި ގައިޑޯއަކީ ރައީސްކަމުގައި ބަލައިގަންނާނެ ކަމަށެވެ. ކުރިން ސްޕެއިންގެ އިސްތިއުމާރުގެ ދަށުގައި އޮތް ވެނެޒުއޭލާގެ 200،000 މީހުން ސްޕެއިންގައި ދިރިއުޅެއެވެ.

އަށް ދުވަހުގެ ތެރޭގައި އިންތިހާބެއް އިއުލާން ނުކޮށްފި ނަމަ ގައިޑޯއަކީ ރައީސްކަމަށް ބަލައިގަންނާނެ ކަމަށް ފަރަންސޭސީ ބޮޑުވަޒީރު މެކްރޮން ވެސް ވަނީ ވިދާޅުވެފައެވެ.

ވެނެޒުއޭލާގެ ގާނޫނު ހަދާ މަޖިލީހުގެ ރައީސްކަން ވެސް ކުރައްވާ 35 އަހަރުގެ ހުއާން ގައިޑޯ، އަމިއްލަފުޅަށް އޭނާއަކީ ވަގުތީ ލީޑަރު ކަމަށް އިއުލާން ކުރެއްވީ ބުދަ ދުވަހުގައެވެ. ގައިޑޯ މިކަން އިއުލާން ކުރެއްވި ފަހުން އެމެރިކާ އާއި ދެކުނު އެމެރިކާގެ ގައުމުތައް ކަމުގައިވާ ބްރެޒިލް، އާޖެންޓީނާ ފަދަ ގައުމުތަކުން ވަނީ އޭނާއަކީ ވަގުތީ ރައީސް ކަމަށް ބަލައިގެންފައެވެ.

ގައިޑޯ ވަނީ ރައީސް މަޑޫރޯއާ އެކު މަޝްވަރާ ކުރައްވަން ދެކޮޅު ހައްދަވައި، އިންތިގާލީ ސަރުކާރެއް ގާއިމުކުރެވެން ދެން މަގުމަތީގެ ހަރަކާތްތައް ކުރިއަށް ގެންދަވާނެ ކަމަށް ވިދާޅުވެފައެވެ.

ހުޅަނގުގެ ގައުމުތަކާއި އަވަށްޓެރި ގިނަ ގައުމުތަކުން ގައިޑޯއަކީ ރައީސްކަމަށް ބަލައިގަންނަން ނިންމި ނަމަވެސް، ވެނެޒުއެލާގެ ބާރުގަދަ އަސްކަރިއްޔާގެ ތާއީދު އޮތީ އަދިވެސް މަޑޫރޯއަށެވެ. އަދި ޗައިނާ އާއި ރަޝިޔާ ފަދަ ދުނިޔޭގެ ބާރުތަކުން ވަނީ މަޑޫރޯގެ ވެރިކަން ދިފާއުކުރާނެ ކަމަށް ބުނެފައެވެ. މި ދެ ގައުމުން ބުނެފައި ވަނީ ވެނެޒުއެލާއާ ދެކޮޅަށް އދ. ގެ ސަލާމަތީ މަޖިލީހަށް އެމެރިކާ އިން ވައްދާފައި އޮތް މައްސަލަ ވީޓޯ ކުރާނެ ކަމަށެވެ.

މައްސަލަ ބޮޑު އިންތިހާބަކަށް ފަހު ދެވަނަ ދައުރަކަށް މަޑޫރޯ ހުވާކުރެއްވީ، އެ ގައުމުގައި ބޭއްވި ރިޔާސީ އިންތިހާބަކީ އިންތިހާބުތަކަށް ކުރި މަލާމާތެއް ކަމަށާއި ބަލައި ނުގަންނަ ކަމަށް ބައިނަލްއަގްވާމީ މުޖުތަމައު އިން ބުނެފައި ވަނިކޮށެވެ. މަޑޫރޯގެ ވެރިކަމުގައި އެ ގައުމުގައި އިގްތިސާދު ވަނީ އިންތިހާއަށް ދަށަށް ގޮސްފައެވެ.