ވެނެޒުއޭލާގައި ވޯޓްލާން ގޮސް ހުރި ނަރުހަކަށް ބަޑިން ހަމަލާދީ މަރާލައިފި

ވެނެޒުއޭލާގެ ވެރިރަށް ކަރަކަސްގައި އިދިކޮޅު ފަރާތްތަކުން އިންތިޒާމްކޮށްގެން ކުރިޔަށްގެންދާ ނުރަސްމީ، ފެންނަ ނުފެންނަ ވޯޓެއްގައި ވޯޓް ލުމަށް ގޮސް ހުރި އުމުރުން 61 އަހަރުގެ ނަރުހެއް ގަޔަށް ބަޑިޖަހައި މަރާލައިފިއެވެ.

ސައިކަލެއްގައި ދިޔަ މީހަކު ކިއުއަށް އަމާޒުކޮށް ބަޑިޖެހުމުން އޭނާ މަރުވެ އިތުރު ތިން މީހަކުވަނީ ޒަޚަމްވެފައެވެ.

އޭޕްރީލް މަހުންފެށިގެން ވެނެޒުއޭލާގައި ސިޔާސީ ހަމަނުޖެހުން ބޮޑުވެ އެ ހަމަނުޖެހުންތަކުގައި މިހާތަނަށް 100 މީހުން ވަނީ މަރުވެފައެވެ.

އާދީއްތަ ދުވަހު ބޭއްވި ގާނޫނީ ހައިސިއްޔަތެއް ލިބިފައިނުވާ މި ފެންނަ ނުފެންނަ ވޯޓްގައި 7 މިލިއަން މީހުން ވޯޓްލާފައިވާކަމަށް މޮނިޓަރިންގ ގްރޫޕްތަކުން ބުނެއެވެ.

ސެންޓްރަލް ޔުނިވާސިޓީ އޮފް ވެނެޒުއޭލާގެ ރެކްޓަރ ސެސިލިއާ ގާސިއާ އަރޯކާ ވިދާޅުވީ 6،492،381 މީހުން ގައުމުގައި ތިބެ ވޯޓް ލާފައިވާކަމަށާއި އިތުރު 693, 789 މީހުން ގައުމުން ބޭރުގައި ބެހެއްޓި ވޯޓް ފޮށިތަކަށް ވޯޓް ލާފައިވާކަމަށެވެ.

ހަމަލާދިން ކަމަށް އިދިކޮޅު ފަރާތްތަކުން ތުހުމަތު ކުރަނީ ހަތިޔާރު އެޅި ގޭންގަކުންނެވެ.

ހާދިސާ ގެ މަންޒަރުތައް ދައްކުވައިދޭ ވީޑިއޯއަކުން ފެންނަ ގޮތުގައި ބަޑިޖެހުމާއެކު ތަން ދޫކޮށް ދިއުމަށް އަވަސްވެ ގަނެ އެތައްބަޔަކު ކްރިސްޓިއަނުންގެ ފައްޅިއަކަށް ވަދެފައިވާކަމަށެވެ.

ވަޒަންއެރި އަންހެން މީހާ މަރުވެފައިވަނީ ހޮސްޕިޓަލަށް ގެންދެވުނުތާ މިނެޓް ކޮޅެއްގެ ތެރޭގައެވެ.