ނޭމާއަށް އަނެއްކާ ވެސް އަނިޔާވެއްޖެ، ދަނޑުން ފޭބީ ރޮމުން

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ނޭމާއަށް އަނެއްކާ ވެސް އަނިޔާވެއްޖެއެވެ.

ނޭމާއަށް އަނިޔާވީ ބުދަ ދުވަހުގެ ރޭ ފްރެންޗް ކަޕްގައި ސްރެސްބާގް އަތުން 0-2 ގެ ނަތީޖާއިން ޕީއެސްޖީ މޮޅުވި މެޗުގައެވެ. އެ މެޗުގައި އޭނާގެ ފަޔަށް ވަނީ އަނިޔާވެފައެވެ.

މެޗަށް ފަހު ނޫސްވެރިންނަށް މައުލޫމާތު ދެމުން ޕީއެސްޖީގެ ކޯޗު ތޯމަސް ޓުޗެލް ބުނީ، ނޭމާގެ ފަޔަށް އަނިޔާވެފައިވާ ކަމަށާއި، އެއީ މިދިޔަ އަހަރު ކުރީކޮޅު ވެސް ފަޔަކީ މިދިޔަ އަހަރު ކުރީކޮޅު ވެސް އަނިޔާވި ފައި ކަމަށެވެ.

ޓުޗެލް ބުނީ، އުމުރުން 26 އަހަރުގެ ނޭމާގެ އަނިޔާއާ ގުޅޭގޮތުން އެއްޗެއް ބުނަން އަދި ނޭނގޭ ކަމަށާއި، އިތުރު މައުލޫމާތު ކުރިޔަށް ހުރި ދުވަސްތަކުގައި ދޭނެ ކަމަށެވެ.

ނޭމާއަށް ލިބުނު މި އަނިޔާއާ އެކު، އަންނަ ފެބްރުއަރީ މަހުގެ 12 ވަނަ ދުވަހު ޔުއެފާ ޗެމްޕިއަންސް ލީގުގައި މެންޗެސްޓާ ޔުނައިޓެޑާ ދެކޮޅަށް ކުޅޭ މެޗުގައި ވެސް ކުޅެވޭނެ ކަމާ މެދު ވަނީ ސުވާލު އުފެދިފައެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާ އެކު ސްޕެނިޝް ލީގު ދެ ފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕަރކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕްވެސް ކާމިޔާބު ކޮށްފައެވެ.

ނޭމާ އަންނަނީ ޕީއެސްޖީއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 53 މެޗުގައި 48 ލަނޑު ޖަހާފައެވެ. ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 96 މެޗުގައި 60 ލަނޑު ކާމިޔާބު ކޮށްފައެވެ.

މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތު އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބު ކޮށްފައެވެ.