ކިޑްނެޕް ކުރި 20000އަށް ވުރެ ގިނަ ނައިޖީރިޔާ އަންހެނުން މާލީއިން ފެނިއްޖެ

ނައިޖިރިޔާއިން ގެއްލިގެން ހޯދަމުން ދިޔަ 20,000 އަށް ވުރެ ގިނަ އަންހެނުންނާއި ކުދިން އަވަށްޓެރި މާލީގެ ދެކުނުގެ ސަރަހައްދުތަކުން ފެނިއްޖެއެވެ.

ނައިޖީރިޔާގެ އެންޓި-ޓްރެފިކިންގް އޭޖެންސީ (ނަޕްޓިޕް)އިން ބުނެފައިވަނީ ނައިޖީރިޔާއިން ކިޑްނެޕްކޮށްގެން މާލީއަށް ގެންގޮސްފައިވާ އަންހެން ކުދިންގެ އަދަދު އުޅެނީ 20000އާއި 45000އާއި ދެމެދުގައެވެ. މި މީހުންގެ ތެރެއިން ގިނަ މީހުންނަކީ ނައިޖީރިޔާގެ ރަށްފުށުގެ ހިސާބުތަކަށް ނިސްބަތްވާ މީހުން ކަމަށް އެ އެޖެންސީއިން ވަނީ ހާމަކޮށްފައެވެ.

ނަޕްޓިޕްގެ ޑިރެކްޓަރު ޖޫލީ އޮކާ-ޑޮންލީ ވިދާޅުވީ މީގެ ތެރެއިން އެއް ބަޔަކަށް ވަޒީފާގެ ދަޅަ ދައްކައިގެން މާލީއަށް ގެންގޮސްފައިވާ އިރު، އެއްބައި ކުދިން ސްކޫލަށް ދިޔަ މަގުމަތީގައި ވެސް ކިޑްނެޕްކޮށްފައިވާ ކަމަށެވެ. އަދި މީގެ ތެރެއިން ގިނަ މީހުންނަކީ މަޖުބޫރުން ހަށިވިއްކުމުގެ ވިޔަފާރީގައި ހަރަކާތްތެރިވާ ފަރާތްތަށް ކަމަށް ވެސް އޮކާ-ޑޮންލީ ވިދާޅުވިއެވެ.

މި އަންހެން ކުދިންތައް ބައިތިއްބާފައި ތިބެނީ ޖަންގަލީގެ އެތެރޭގެ ހިސާބުތަކުގައި، ފިލަން އުނދަގޫ ވާނެ ގޮތަށް ކަމަށް ވިދާޅުވަމުން އޮކާ-ޑޮންލީ ވަނީ މި އަންހެން ކުދިންގެ ދިރިއުޅުމުގެ ހާލަތު ސިފަކޮށްދީފައެވެ.

އެފްރިކާގެ އެއްމެ އާބާދީ ބޮޑު ގައުމު ކަމުގައިވާ ނައިޖީރިޔާގެ ހިއުމަން ޓްރެފިކިންގެ ޝިކާރައަކަށްވެފައިވާ މީހުން ދުނިޔޭގެ 40އަށް ވުރެ ގިނަ ގައުމުގައި އުޅޭ ކަމަށް އެމެރިކާގެ ސްޓޭޓް ޑިޕާޓްމަންޓުގެ ރިޕޯޓެއްގައި ވެއެވެ. ނައިޖީރިޔާގެ އިންސާނުންގެ ވިޔަފާރީގައި އެ ގައުމުގެ ސިފައިން ވެސް ބައިވެރިވާ ކަމަށް ބައެއް ފަރާތްތަކުން ވަނީ ތުހުމަތުކޮށްފައިއެވެ.