ޔޫތު ޗެމްޕިއަންޝިޕް: މިފަހަރު ވާދަކުރަނީ ނުވަ ޓީމު

ދިވެހި ފުޓުބޯޅަ ސީޒަނުގައި މި ފަހަރު ކުޅޭ ފުރަތަމަ މުބާރާތް ކަމަށްވާ ޔޫތު ޗެމްޕިއަންޝިޕްގައި ބައިވެރި ވަނީ ނުވަ ޓީމު ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

މި ފަހަރުގެ މުބާރާތުގައި 21 އަހަރުން ދަށުގެ ކުޅުންތެރިން ވާދަކުރާއިރު، މުބާރާތުގައި ބައިވެރިވީ ނިއުރޭޑިއަންޓް ސްޕޯޓްސް ކަލްބާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ވިކްޓްރީ ސްޕޯޓްސް ކްލަބާއި، ކްލަބް އީގަލްސް އާއި ކްލަބް ގްރީން ސްޓްރީޓާއި، ދަ ގްރާންޑޭ އަމީގޯސް ނިއު ޖެނެރޭޝަން ސްޕޯޓްސް ކްލަބް (ދަ ގޭންގް) އާއި ށ. ފޯކައިދޫ އަދި ބ. އޭދަފުއްޓެވެ.

ޔޫތު ޗެމްޕިއަންޝިޕްގައި މިފަހަރު ބައިވެރިނުވަނީ ޔުނައިޓެޑް ވިކްޓްރީ އާއި ފ. ނިލަންދޫއެވެ. މި ދެ ޓީމު ވަނީ މީގެ ކުރިން އޮތް މުބާރާތުގައި ކުޅެފައެވެ.

ދެ ގްރޫޕަކަށް ބަހާލައިގެން ކުޅޭ މި މުބާރާތް ރޭވިފައިވާ ގޮތުން އެއް ގްރޫޕަށް ފަސް ޓީމު އަދި އަނެއް ގްރޫޕަށް ހަތަރު ޓީމު ބަހާލެވޭނެއެވެ. ސެމީ ފައިނަލަށް ދަތުރުކުރާނީ ކޮންމެ ގްރޫޕަކުން ދެ ޓީމެކެވެ.

އެފްއޭއެމުން މި މުބާރާތް ފަށަން ތާވަލްކޮށްފައި ވަނީ އަންނަ މަހު ފުރަތަމަ ހަފްތާ ތެރޭގައެވެ.

މުބާރާތަށް މި މަހުގެ ކުރީކޮޅު ގިނަ ޓީމުތަކުން ފަރިތަކުރުންތައް ފަށާފައިވާއިރު، ގިނަ ޓީމުތަކުން ކުޅުންތެރިން ހޯދުމުގެ ގޮތުން ވަނީ ޓްރަޔަލްތަކެއް ބާއްވާފައެވެ.

ޔޫތު ޗެމްޕިއަންޝިޕަކީ ގިނަ ކުޅުންތެރިންތަކެއް ތައާރަފު ވެގެން ގޮސްފައިވާ މުބާރާތެކެވެ. މި މުބާރާތުން ވިދާލި ގިނަ ކުޅުންތެރިން އަންނަނީ ރާއްޖޭގެ ފުރަތަމަ ޑިވިޝަންގެ ޓީމުތަކުގައި މުހިންމު ރޯލުތައް އަދާކުރަމުންނެވެ. ހަމައެހެންމެ މި ކުޅުންތެރިންގެ ތެރޭގައި ގައުމީ ޓީމުގެ ފުރަތަމަ 11 ގައި ހިމެނޭ ކުޅުންތެރިން ވެސް ހިމެނެއެވެ.

އެފްއޭއެމް އިން 2011 ވަނަ އަހަރު ބާއްވަން ފެށި މި މުބާރާތް މެދުނުކެނޑި 2014 ވަނަ އަހަރުގެ ނިޔަލަށް ވަނީ ކުރިޔަށް ގެންގޮސްފައެވެ. އެއަށްފަހު މިދިޔަ ދެއަހަރު މުބާރާތް ވަނީ ކުރިޔަށް ގެންގޮސްފައެވެ.

މުބާރާތުގެ އެންމެ ފަހުގެ ޗެމްޕިއަނުންނަކީ ގްރީން ސްޓްރީޓެވެ. މި މުބާރާތް އީގަލްސްއިން ތިން ފަހަރު ކާމިޔާބުކޮށްފައިވާއިރު، މާޒިޔާ އާއި ކްލަބް ވެލެންސިއާއިން ވެސް ވަނީ މި މުބާރާތް މީގެކުރިން ކާމިޔާބުކޮށްފައެވެ.