ޑިފެންސް މިނިސްޓަރު ރަސްމީ ދަތުރުފުޅެއްގައި އިންޑިއާ އަށް ފުރާވަޑައިގެންފި
ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގަންނަވާނީ މިމަހުގެ 30 ވަނަ ދުވަހު
މިނިސްޓަރު އޮފް ޑިފެންސް މާރިޔާ އަޙްމަދުދީދީ
މިނިސްޓަރު އޮފް ޑިފެންސް މާރިޔާ އަޙްމަދުދީދީ، ރަސްމީ ދަތުރުފުޅެއްގައި އިންޑިއާ އަށް މިއަދު ހެނދުނު ފުރާވަޑައިގަންނަވައިފިއެވެ.
ޑިފެންސް މިނިސްޓަރު ޢިންޑިއާ އަށް ކުރައްވާ މި ދަތުރުފުޅުގައި، ދިފާޢީ އަދި އަސްކަރީ ދާއިރާ އިން ދިވެހިރާއްޖެ އާއި، އިންޑިއާ ސަރުކާރާ ދެމެދު އޮންނަ އަސްކަރީ ގުޅުން އިތުރަށް ބަދަހިކުރުމާ ބެހޭ ގޮތުން އިންޑިއާ ސަރުކާރާ އެކު މަޝްވަރާކުރުމަށް ހަމަޖެހިފައިވާ ކަމަށް ޑިފެންސް މިނިސްޓްރީން މައުލޫމާތުދެއެވެ. އެ ކަމަނާގެ ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގަންނަވާނީ މި މަހުގެ 30 ވަނަ ދުވަހުއެވެ.
މި ދަތުރުފުޅުގައި އެ ކަމަނާގެ އަރިހުގައި މޯލްޑިވްސް ނޭޝަނަލް ޑިފެންސް ފޯސްގެ ޗީފް އޮފް ޑިފެންސް ފޯސް، މޭޖަރ ޖެނެރަލް ޢަބްދުﷲ ޝަމާލާއި، ޑިޕާޓްމަންޓް އޮފް އިންޓަރނޭޝަނަލް ޑިފެންސް ކޯޕަރޭޝަން އެންޑް ޕޮލިސީގެ ޑެޕިއުޓީ ޑައިރެކްޓަރ ޖެނެރަލް ކާނަލް ޢަބްދުލްމަތީން އަޙްމަދު އަދި އެމްއެންޑީއެފް ކޯސްޓްގާޑުގެ ޕްރިންސިޕަލް ޑައިރެކްޓަރ، ލެފްޓިނެންޓް ކާނަލް މުޙައްމަދު ސަލީމް ވަނީ ބައިވެރިވެވަޑައިގެންފައެވެ.
މިއީ އެކަމަނާ މަޤާމާ ހަވާލުވެވަޑައިގެންނެވިފަހުން ރާއްޖޭން ބޭރަށް ކުރައްވާ ފުރަތަމަ ރަސްމީ ދަތުރުފުޅެވެ.
