އިންޑަސްޓްރިއަލް ވިލެޖްގައި ޕަވަރ ޕްލާންޓަކާއި ސަބްސްޓޭޝަނެއް ބަހައްޓަނީ

މާލޭ އިންޑަސްޓްރިއަލް ވިލެޖްގައި 16 މެގަވޮޓް ޕަވަރ ޕްލާންޓަކާއި 132 kVA ސަބްސްޓޭޝަނެއް، ކޮންޓްރެކްޓަރ ފައިނޭންސް އުސޫލުން ސަޕްލައިކޮށް، އިންސްޓޯލް ކޮށްދޭނެ ފަރާތެއް ހޯދުމަށް ސްޓެލްކޯއިން އިއުލާން ކޮށްފިއެވެ.

ސްޓެލްކޯއިން ކޮށްފައިވާ އިއުލާނުގައި ބުނެފައިވަނީ އެމަސައްކަތަށް އަގުހުށަހެޅުމުގެ ފުރުޞަތު ރާއްޖެ އާއި ރާއްޖެއިން ބޭރުގެ ފަރާތްތަކަށް ހުޅުވާލެވިފައިވާ ކަމަށެވެ. އަދި އެފަރާތްތަކުން 2019 ޖެނުވަރީ 27 އިން 2018 ފެބްރުއަރީ 07 ގެ ނިޔަލަށް ބަންދުނޫން ކޮންމެ ދުވަހަކު ހެނދުނު 09:00 އިން މެންދުރު 15:00 އާ ދެމެދު 200 ޔޫ.އެސް ޑޮލަރު ނުވަތަ އެއަގަށްވާ ދިވެހި ރުފިޔާއަށް ޑޮކިއުމަންޓް ބައްލަވައިގަތުމަށްފަހު، 2019 ފެބްރުއަރީ 10 ވާ (އާދީއްތަ) ދުވަހުގެ 11:00 އަށް ސްޓެލްކޯއަށް ވަޑައިގެން މަޢުލޫމާތު އޮޅުންފިލުވުމަށް އެކުންފުނިން އެދެއެވެ.

Advertisement

2019 ފެބްރުއަރީ 24 ވާ (އާދީއްތަ) ދުވަހުގެ 11:00 އަށް އަންދާސީހިސާބު ހުށަހެޅުމަށް ވެސް ސްޓެލްކޯ އިން އެދެއެވެ. ބިޑް ޑޮކިއުމަންޓް ދޫކުރެވެނީ 2019 ޖެނުވަރީ 30 އިން 2019 ފެބްރުއަރީ 07 ގެ ނިޔަލަށް ބަންދުނޫން ކޮންމެ ދުވަހަކު ހެނދުނު 09:00 އިން 15:00 އާ ދެމެދުގައެވެ.

އެމަސައްކަތުގެ ބިޑް ސެކިއުރިޓީގެ ގޮތުގައި 500,000.00 (ފަސްލައްކަ ރުފިޔާ) ނުވަތަ އެއަގަށްވާ ޔޫ.އެސް ޑޮލަރު ހުށަހަޅަން ޖެހެއެވެ. އަދި ޕާރފޯމަންސް ސެކިއުރިޓީގެ ގޮތުގައި، ހުށަހަޅާ އަގުގެ 15 އިންސައްތަ ބިޑް ކާމިޔާބު ކުރައްވާ ފަރާތުން އަދާކުރަންޖެހޭނެއެވެ.

މާލޭގެ އެކި ސަރަހައްދުތަކަށް ދޭތެރެ ދޭތެރެއިން ކަރަންޓު ކެނޑޭ މައްސަލަ މިފަހަކަށް އައިސް ދިމާވެއެވެ. އިންޑަސްޓްރިއަލް ވިލެޖްގައި ޕަވަރ ޕްލާންޓެއް ގާއިމް ކުރުމަށް ސްޓެލްކޯއިން މަސައްކަތް ކުރަމުންދާއިރު ރައީސް އިބްރާހިމް ސޯލިހުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ރާއްޖޭގެ ރައްޔިތުންނަށް ފޯރުކޮށްދެމުންދާ ކަރަންޓުގެ އަގު ހެޔޮކުރުމަށްވަނީ ނިންމަވާފައެވެ.