ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި މާލޭގެ ދާއިރާގެ ހުރިހާ ގޮނޑި އެއްވެސް ފަސޭހަ ކަމާއެކު އެމްޑީޕީން ކާމިޔާބު ކުރާނެ ކަމަށް އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.  

މައްޗަންގޮޅި މެދު ދާއިރާގެ ޕްރައިމަރީ ކާމިޔާބު ކުރުމުގެ އުފަލުގައި އެމަނިކުފާނާ ވާދަ ކުރެއްވި އައިޝަތު އަލައިކާ އަދުނާން ބޭއްވި ހަފްލާއެއްގައި ވާހަކަފުޅު ދައްކަވަމުން ނަޝީދު ވިދާޅުވީ، ޕްރައިމަރީގައި ނާކާމިޔާބީއާ ކުރިމަތިލާން ޖެހުނު ހުރިހާ ކެޑިޑޭޓުން ވެސް މޮޅުވި ކެޑިޑޭޓުންގެ ފަހަތަށް އަރާފައިވާ ކަމަށެވެ.

ހަމަ އެއާކު އޭގެ ސަބަބުން މަލޭގެ ހުރިހާ ގޮނޑިތަކެއް ވެސް ކާމިޔާބު ކުރަން ފަސޭހަވާނެ ކަމަށް ނަޝީދު ވިދާޅުވިއެވެ.

''މި ފަހަރުގެ މާލޭގެ 15 ގޮނޑި އެމްޑީޕީއަށް އިރާދަކުރެއްވިއްޔާ ފަސޭހަ ކަމާއެކީ ލިބޭނެ،'' އެމަނިކުފަނު ވިދާޅުވިއެވެ.  

ނަޝީދު ވިދާޅުވީ، އެމްޑީޕީން މިހާރު އެންމެ އިސްކަމެއް ދޭން ޖެހޭނީ އެ ޕާޓީގެ ހުރިހާ މެމްބަރުން އެއްތަނަކަށް ޖަމާކުރުން ކަމަށެވެ. އެގޮތަށް އަމަލު ކުރެވިއްޖެނަމަ މަޖިލިސް އިންތިހާބު ކާމިޔާބު ވެގެންދާނެ ކަމަށް އެމަނިކުފާނު ވިދާޅުވިއެވެ.

މައްޗަންގޮޅި މެދު ދާއިރާގެ ޕްރައިމަރީ ކާމިޔާބު ކުރެއްވި ނަޝީދު ވިދާޅުވީ، އިންތިހާބު ކާމިޔާބު ކުރެވޭނީ ހުރިހާ މެމްބަރުންގެ ވެސް އެހީތެރިކަމާ އެކު ކަމަށާއި، ޕްރައިމަރީ ނަކާމިޔާބުވި ކެޑިޑޭޓުންނަކީ ބަލިވި ކެޑިޑޭޓުންނެއް ނޫން ކަމަށް އެމަނިކުފާނު ވިދާޅުވިއެވެ.

އެމްޑީޕީގެ ޕްރައިމަރީގެ ސަބަބުން ޕާޓީ ބިނާވެ އެކިއެކި ކެމްޕޭނު ޓީމުތައް ޕާޓީ ތެރޭ އުފެދޭ ކަމަށް ނަޝީދު ވިދާޅުވިއެވެ.

''ޕްރައިމަރީ ހިންގީ މަ އޭގެ ސަބަބުން ޕާޓީ ބިނާވެ. ޕާޓީ ބޮޑުވޭ. އަދި ކެންޕޭނު ތަކަށް ނިކުތުމަށް ތައްޔާރުވޭ އަދި އެކި އެކި ކެމްޕޭނު ޓީމްތައް ޕާޓީ ތެރޭގައި އުފެދޭ. އަޅުގަނޑުމެންނަށް އެއް ޓީމާއި އަނެއް ޓީމައި ގުޅި ކިތަންމެ ކުރި އެރުމެއް ޕާޓިއަށް ލިބިގެންދޭ. އަޅުގަނޑުމެންނަށް މި ޕްރައިމަރީ އަށްވެސް އެމްޑީޕީއަށް  ވަރަށް ގިނަ ކުރިއެރުންތައް ލިބިއްޖެ.''  އެމަނިކުފާނުގެ ޕާޓީ ހޯއްދެވި ކާމިޔާބު ބަޔާން ކުރައްވަމަުން ނަޝީދު ވިދާޅުވިއެވެ