ބެޑްމިންޓަން އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ 16 ވަނަ އިންޓަ ސްކޫލް ބެޑްމިންޓަން މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

ބެޑްމިންޓަން އެސޯސިއޭޝަނުން ނެރުނު ބަޔާނެއްގައި ބުނީ މުބާރާތް ކުރިޔަށް ގެންދިޔުމަށް ޝެޑިއުލް ކުރެވިފައިވަނީ އަންނަ މާޗު މަހުގެ ހަތްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ކަމަށެވެ.

އެ ބަޔާނުގައި އިތުރަށް ބުނީ، މުބާރާތުގެ ޓީމް އިވެންޓުގައި ބައިވެރިވާން ބޭނުންވާ ސްކޫލްތައް މުބާރާތާ ބެހޭ އެންމެހާ ކަންކަމުގައި މުއާމަލާތް ކުރާނެ ފޯކަލް ޕޮއިންޓެއް ކަނޑައަޅުއްވާ، އެފަރާތެއްގެ ނަމާއި މަގާމް އަދި ގުޅޭނެ ނަންބަރު ފެބްރުއަރީ މަހުގެ ހަތެއްވާ ބުރާސްފަތި ދުވަހު މެންދުރު 14:00 ގެ ކުރިން ހުށަހެޅުމަށެވެ.

މުބާރާތުގެ ޓީމް އިވެންޓްގައި ހިމެނެނީ 14 އަހަރުން ދަށުގެ ފިރިހެން އަދި އަންހެން، 16 އަހަރުން ދަށުގެ ފިރިހެން އަދި އަންހެން އަދި 19 އަހަރުން ދަށުގެ ފިރިހެން އަދި އަންހެން ކެޓަގަރީއެވެ.

މުބާރާތުގެ އަމިއްލަ އިވެންޓުގެ އުމުރުފުރާތަކަކީ 12 އަހަރުން ދަށުގެ ސިންގަލްސް، 14 އަހަރުން ދަށުގެ ސިންގަލްސް އަދި ޑަބަލްސް، 16 އަހަރުން ދަށުގެ ސިންގަލްސް، ޑަބަލްސް އަދި މިކްސް ޑަބަލްސް، 19 އަހަރުން ދަށުގެ ސިންގަލްސް، ޑަބަލްސް އަދި މިކްސް ޑަބަލްސްއެވެ.

މުބާރާތާ ގުޅޭގޮތުން އެއްވެސް މައުލޫމާތެއް ބޭނުންވާނަމަ ސަރުކާރު ބަންދުނޫން ކޮންމެ ދުވަހެއްގެ ހެނދުނު 9 އިން ހަވީރު ހަތަރަކަށް ބެޑްމިންޓަން އެސޯސިއޭޝަންގެ ފޯން ނަމްބަރު 3314057 އަށް ގުޅުމަށް ވަނީ އެދިފައެވެ.