ގޯލްކީޕިން ކޯޗިން ސެޓިފިކެޓް ކޯސް ފަށައިފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ ގޯލްކީޕިން ކޯޗިން ސެޓިފިކެޓް ކޯސް ފަށައިފިއެވެ.

ގޯލްކީޕަރުން ތަމްރީނުކުރާ ކޯޗުންނަށް ހުޅުވާލައިގެން ބާއްވާ މި ކޯސް އާދީއްތަ ދުވަހު ފަށާފައިވާއިރު، މި ކޯސް ފަސް ދުވަހުގެ މުއްދަތަށް ކުރިޔަށްދާނެއެވެ.

މި ކޯސް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ވިކްޓްރީ ސްޕޯޓްސް ކްލަބްގެ ވައިސް ޗެއާމަން އަދި މަޝްހޫރު ގޯލު ކީޕަރު މައުރޫފް އަހްމަދު (މާއްޓޭ) އެވެ.

ޒުވާން ގޯލްކީޕަރުން އުފެއްދުމަށް އަމާޒު ހިފައިގެން އެފްއޭއެމުން ފަށާފައިވާ މަސައްކަތް އިތުރަށް ފުޅާކުރުމަށް ބާއްވާ މި ކޯހުގައި ތަމްރީނު ދެނީ އޭއެފްސީގެ ތަޖުރިބާކާރު ގޯލްކީޕިން އިންސްޓްރަކްޓަރެކެވެ.

މިއީ 2006 ވަނަ އަހަރަށްފަހު ގޯލްކީޕަރުން ތަމްރީނުކުރާ ކޯޗުންނަށް ހާއްސަކޮށްގެން ބާއްވާ ފުރަތަމަ ކޯސް ކަމަށްވާއިރު، މިފަހަރުގެ ކޯހުގައި ފިރިހެން ކޯޗުންގެ އިތުރުން، އަންހެން ހަތަރު ކޯޗުން ވަނީ ބައިވެރިވެފައެވެ.

އެފްއޭއެމުން ވަނީ ދިވެހި ގޯލްކީޕަރުންނަށް ފުރުސަތުތައް އިތުރު ކުރުމުގެ ގޮތުން 2020 ވަނަ އަހަރުން ފެށިގެން ވަކި މުއްދަތެއް ނެތްގޮތަށް ރާއްޖޭގެ ކްލަބްތަކަށް ބިދޭސީ ގޯލްކީޕަރުން ނުގެނެވޭ ގޮތަށް ނިންމާފައެވެ.