ވޯލްޑް ބޭންކުގެ ރައީސް ހޮވުމުގައި އިވާންކާ ޓްރަމްޕް އެހީވަނީ

ވޯލްޑް ބޭންކުގެ ރައީސްގެ މަގާމަށް މީހަކު އިޚްތިޔާރު ކުރުމުގައި ރައީސް ޑޮނަލްޑް ޓްރަމްޕުގެ ދަރިކަނބަލުން އިވާންކާ ޓްރަމްޕުގެ އެހީތެރިކަން ލިބޭނެކަމަށް ވައިޓް ހައުސްއިން ބުނެފިއެވެ.

ވައިޓް ހައުސްގެ ޑެޕިއުޓީ ޑިރެކްޓާ އޮފް ކޮމިއުނިކޭޝަންސް ޖެސިކާ ޑިރޯ ވިދާޅުވީ، ޓްރެޝަރީ ސެކްރެޓަރީ ސްޓީވް ނުޗިން އަދި ވައިޓް ހައުސްގެ ޗީފް އޮފް ސްޓާފް މިކް މުލް ވަނީ، ވޯލްޑް ބޭންކަށް ރައީސަކު ހޮވުމުގައި އިވަންކާގެ އެހީތެރިކަމަށް އެދިވަޑައިގެންފައިވާ ކަމަށެވެ.

ސަބަބަކީ ވޯލްޑް ބޭންކުގެ އިސްވެރިންނާއިއެކު އަދި ޖިމް ޔޮންގް ކިމް އާއި އެކު ފާއިތުވި ދެއަހަރުވެސް އިވަންކާ މަސައްކަތް ކުރަށްވާފައި ވުމެވެ.

އާއްމު ގޮތެއްގައި ވޯލްޑް ބޭންކަށް ރައީސަކު އިޚްތިޔާރު ކުރަނީ އެމެރިކާ އިންނެވެ. އަދި އެ ބެންކު އުފެދުނީއްސުރެން އެބޭންކަށް ރައީސަކު ހޮވުމުގައި އެމެރިކާގެ ނުފޫޒް އޮންނަކަން ފާހަގަ ކުރެވެއެވެ.

ވޯލްޑް ބޭންކުގެ ރައީސް ޖިމް ޔޮންގް ކިމްގެ ޓާމް ނިމުމުގެ ތިން އަހަރު ކުރިން، ކުއްލި ގޮތަކަށް އިސްތިއުފާ އިއުލާން ކުރެއްވީ މިދިޔަ ހަފުތާގައެވެ. ކިމްގެ ބަދަލުގައި ވޯލްޑް ބޭންކުގެ ރައީސްގެ މަގާމަށް އައްޔަން ކޮށްފާނެ ކަމަށް ބެލެވުނު މީހުންގެ ތެރޭގައި އިވަންކާ ހިމެނެއެވެ. ނަމަވެސް ވައިޓް ހައުސް އިން ބުނެފައި ވަނީ ވޯލްޑް ބޭންކުގެ ރައީސްގެ މަގާމަށް އިވަންކާ ކުރިމަތިނުލައްވާނެ ކަމަށެވެ.