ހޮނިހިރު ދުވހުގެ ހެނދުނު މާލޭގެ ކާރޫބާރޫ ބޮޑު މަސްމާރުކޭޓު ސަރަހައްދުގައި ހިނގި ނުރައްކާތެރި އެކްސިޑެންޓުގައި އަނިޔާވި ކުއްޖާ ނިޔާވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުނެފިއެވެ.

ފުލުހުން ބުނީ މިއަދު ހެނދުނު 7:05 ހާއިރު މަސްމާރުކޭޓު ކައިރީގައި ހިނގި އެކްސިޑެންޓްގައި އަނިޔާވީ އުމުރުން 17 އަހަރުގެ ކުއްޖަކަށް ކަމަށާއި އެކްސިޑެންޓް ހިނގީ ޕާކު ކޮށްފައި އޮތް ޕިކަޕެއްގައި ބާރަށް ދުއްވާފައި ދިޔަ ސައިކަލެއް ޖެހިގެން ކަމަށެވެ. މި ހާދިސާގައި މަރުވީ އަހްމަދު އަބްދުލް ބާސިތު، މ. އަހިމާގެ އެވެ.

އެ ކުއްޖާ ހޮސްޕިޓަލަށް ގެންދިޔަ އިރު ވެސް ހާލު ސީރިއަސް ކަމަށް ޑޮކްޓަރުން ވިދާޅުވާ ކަމަށް ކުރިން ފުލުހުން ބުނެފައި ވެއެވެ.

ހޮސްޕިޓަލަށް ގެންދިއުމަށް ޕިކަޕަކަށް އެ ކުއްޖާ އެރުވި އިރު ވެސް އެއްވެސް ހަރަކާތެއް ނެތްކަން ފާހަގަކޮށްލެވެއެވެ. ބޭރު ފުށުން މާ ބޮޑު ޒަހަމްތަކެއް ފެންނަން ނެތް ނަމަވެސް އޭނާގެ ނޭފަތުން ގިނަ އަދަދަކަށް ލޭ ފައިބަމުން ދިޔަ ކަމަށް މަންޒަރު ދުށް ބައެއް މީހުން ބުނެފައި ވެއެވެ.