މޯލްޑިވްސް އިންޓަނޭޝަނަލް މެރެތަން އަންނަ މަހު، ބައިވެރިވުމަށް ފުރުސަތު ހުޅުވާލައިފި

މޯލްޑިވްސް އިންޓަނޭޝަނަލް މެރެތަންގެ ނަމުގައި މުޅިން އާ ބައިނަލްއަގްވާމީ ދުވުމުގެ އިވެންޓެއް އަންނަ މާޗު މަހުގެ 8 ވަނަ ދުވަހު ހުޅުމާލޭގައި ބާއްވަން ރާވައި ބައިވެރިވުމުގެ ފުރުސަތު ހުޅުވާލައިފިއެވެ.

އައި-ރަނާސް އާއި އޮބްޖެކްޓް އަދި ޔުނިކްސް ސްޕޯޓިން ގުޅިގެން ބާއްވާ މި އިވެންޓް އެތުލެޓިކްސް އެސޯސިއޭޝަން މޯލްޑިވްސް އާއި މިނިސްޓްރީ އޮފް ޓޫރިޒަމުން ވަނީ އެޕްރޫވްކޮށްފައެވެ.

މި އިވެންޓުގައި ހިމެނޭ މެރެތަން އާއި ހާފް މެރެތަން އަދި 10 ކިލޯމީޓަރުގެ ދުވުން މާޗު މަހުގެ 8 ވަނަ ދުވަހު އޮންނައިރު، މާޗު ނުވަ ވަނަ ދުވަހު އާއިލީ ތިން އިވެންޓަކާއި، ނިމުމުގެ ރަސްމިއްޔާތު އޮންނާނެއެވެ.

މާޗު 8 ވަނަ ދުވަހު އޮންނަ މެރަތަން ފެށުމަށް ހަމަޖެހިފައިވަނީ މެންދަމު 2 ޖަހާއިރެވެ. ހާފް މެރެރަން ފަތިހު 5:30 ގައި ފަށާއިރު، 6:30 ގައި 10 ކިލޯމީޓަރު ދުވުން އޮންނާނެއެވެ. އަދި ފަސް ކިލޯމީޓަރުގެ ދުވުން ފަށާނީ އެ ދުވަހުގެ ހަވީރު 4:30 ގައެވެ.

މާޗު ނުވަ ވަނަ ދުވަހު އިވެންޓުތަކުގެ ތެރޭގައި ސީނިއާސް ޕަވާ ވޯކްގެ ނަމުގައި އުމުރުން ދުވަސްވީ މީހުންގެ ހިނގުމާއި ކުޑަކުދިންނަށް ހާއްސަކޮށްގެމް ކިޑްސްމައިލް 3.2 ކިލޯމީޓަރު، 1.6 ކިލޯމީޓަރު އަދި 800 މީޓަރު ދުވުމެއް އޮންނާނެއެވެ. އެ އަށް ފަހު ފިނިޝާ ޕާޓީ އާއި އެވޯޑިން ރަސްމިއްޔާ ފެށުމަށް ހަމަޖެހިފައިވަނީ އެ ދުވަހު ހަވީރު ފަހެއް ޖަހާއިރެވެ.

މި މެރެތަންގައި ބައިވެރިވުމުގެ ފުރަތަމަ ފުރުސަތު މިހާރު ހުޅުވާލާފައިވާއިރު، އޮންލައިން ރަޖިސްޓްރޭޝަން ލިންކް އިވެންޓުގެ ފޭސްބުކް ޕޭޖުން ފެންނާނެއެވެ.

ރިކްރިއޭޝަނަލް ދުވުންތެރިން ތަމްރީންކުރުމުގައި ފާހަގަކުރެވޭ އައި-ރަނާސް އިން އަންނަނީ އައްޑޫ ސިޓީ އާއި ލ. އަތޮޅުގައި ވެސް ދުވުމުގެ އިވެންޓްތައް ބާއްވަމުންނެވެ.