މުސާރަ އާއި މަސައްކަތުގެ މާހައުލުގެ ހާލަތާ މެދު ނިއުޒީލޭންޑްގެ އެކި ކަންކޮޅުތަކުން ޖޫނިއަރ ޑޮކްޓަރުންގެ 80 އިންސައްތައާ ގާތްކުރާ އަދަދަކަށް ޑޮކްޓަރުން މަސައްކަތްހުއްޓާލުމަށް ފަހު އިހުތިޖާޖުކޮށްފިއެވެ.

އަންގާރާ ދުވަހު ޑޮކްޓަރުން އިހުތިޖާޖަށް ނުކުތީ ޔޫނިއަން އިން ސަރުކާރާ އެކު ކުރަމުންދިޔަ މަޝްވަރާތައް ކޮޅެއްގައި ނުޖެހުމުންނެވެ

އިގްތިސާދީ ފަރަގުތައް ކުޑަކޮށް އިޖުތިމާއީ ދާއިރާއަށް ހޭދަކުރައްވާ މިންވަރު އިތުރުކުރައްވާނެ ކަމަށް 2017 ވަނަ އަހަރު ބޮޑުވަޒީރުކަމަށް ވަޑައިގެންނެވި ޖެސިކާ އާޑަރން ވެވަޑައިގެންފައިވާ ވައުދު ފުއްދެވުމަށް ގޮންޖެހުން އޮތް މިންވަރު އަންގާރަ ދުވަހުގެ މުޒާހަރާއިން ދައްކައިދެއެވެ.

ވާތުފިޔައިގެ މެދުމިނުގެ ސަރުކާރަށް ތާއީދުކުރާ ޔޫނިއަން އިން ބުނެފައިވަނީ މަސައްކަތްތެރިންގެ ހަޅުތާލަކަށް ދާންޖެހުނީ މުސާރައިގެ ކުރިއެރުން ލަސްވާއިރު ދިރިއުޅުމުގެ އަގު އަރައިގެންދާތީ ދިިމާވާ ގޮންޖެހުންތަކުގެ ސަބަބުން ކަމަށެވެ.

މި މައްސަލައިގައި ޓީޗަރުންނާއި ނަރުހުންނާއި ކޯޓް އޮފިޝަލުން ވެސް މިދިޔަ އަހަރު ވަނީ މުޒާހަރާކޮށްފައެވެ.

"އަޅުގަނޑުމެން މަސައްކަތްކުރީ އިހުތިޖާޖްނުކޮށް މައްސަލަ ހައްލުކުރުމަށް އެކަމަކު އެހެން އެއްވެސް ގޮތެއްނެތީ" ޔޫނިއަންގެ ސެކްރެޓަރީ ޖެނެރަލް ޑެބޯރާ ޕަވަލް ވިދާޅުވިއެވެ.

ސަރުކާރުގެ 3،300 ޖޫނިއަރ ޑޮކްޓަރުންނާ އެކު ޖުމްލަ 3،700 ޑޮކްޓަރުންވަނީ ހޮސްޕިޓަލްތަކާއި ކްލިނިކްތަކަށް ނުނިކުމެ އިހުތިޖާޖްކޮށްފައެވެ.

ޖޫނިއަރ ބައެއް ޑޮކްޓަރުން މަގުތަކުގެ ކަންމަތިތަކުގައި މަސައްކަތުގެ ވަގުތު ކުޑަކޮށްދިނުމަށް ލިޔެފައިވާ ބޯޑްތައް ހިފައިގެން ތިބި ނަމަވެސް މާބޮޑަށް ޝުއޫރު ފާޅުކުރުމެއް ނެތެވެ.

ޑޮކްޓަރުންގެ ހަޅުތާލާ އެކު އެތައް ހާސް އޮޕަރޭޝަނަކާއި އެންމެ މުހިއްމު ނޫން އެ ޕޮއިންޓްމެންޓްތަކާއި ސިއްޚީ ބައެއް ޚިދުމަތްތައްް މެދުކެންޑިގެންދިޔައެވެ.

ޔޫނިއަންއިން ވަނީ ދެވަނަ ހަޅުތާލެއް 48 ގަޑިއިރަށް ދެމިގެންދާގޮތަށް ޖެނުއަރީމަހުގެ 29 އަދި 30 އޮންނާނެކަން އިއުލާނުކޮށްފައެވެ.