ބޭންކް އޮފް މޯލްޑިވްސް (ބީއެމްއެލް)ގެ އެކައުންޓަކުން ގާތްގަނޑަކަށް 10 މިލިއަން ރުފިޔާ ވަގަށް ނެގި މައްސަލައެއް ފެންމަތިވެ، ދެ މުވައްޒަފަކު ސަސްޕެންޑްކޮށްފިއެވެ.
ރާއްޖެއެމްވީއަށް އެނގިފައިވާ ގޮތުގައި، މި ބޮޑު ވައްކަމާ ގުޅިގެން މިދިޔަ ހަފުތާގެ ތެރޭގައި ސަސްޕެންޑްކުރި ދެ މުވައްޒަފުންނަކީ ދެމަފިރިންނެވެ. އެ ދެމަފިރިން ވަޒީފާ އަދަކުރަނީ ބޭންކްގެ ދެ ޑިޕާޓްމެންޓެއްގައެވެ. އެ މީހުންގެ ތެރެއިން ފައިސާ ޓްރާންސްފަރކޮށްފައި ވަނީ، ފިރިހެން މީހާއެވެ.
ދެ މުވައްޒަފަކު ސަސްޕެންޑްކޮށްފައިވާކަން ބީއެމްއެލްއިން ދޮގެއް ނުކުރެއެވެ.
އެ ބޭންކުގެ އޮފިޝަލަކު ވިދާޅުވި ގޮތުގައި ބޭންކުގައި ހިނގާފާނެ ނުރަނގަޅު އަމަލެއް ނުވަތަ އިހުމާލެއް ދެނެގަތުމަށްޓަކައި ހަރުދަނާ ގަވައިދުތަކާއި އުސޫލުތަކުގެ އިތުރުން އިންޓަރނަލް ކޮންޓްރޯލްތައް ބޭންކް އޮފް މޯލްޑިވްސްގައި ވަނީ ގާއިމްކުރެވިފައެވެ. އެއްވެސް މުވައްޒަފަކު ގަވައިދާ ޚިލާފު ކަމެއް ކޮށްފި ނަމަ ތަހްގީގީ އިދާރާތައް މެދުވެރިކޮށް އެކަމެއް ތަހްގީގުކޮށް އަޅަން ޖެހޭ އެންމެ ހަރުކަށި ފިޔަވަޅު ބޭންކުން އަޅާނެ ކަމަށް އޭނާ ވިދާޅުވިއެވެ.
ފައިސާ ނަގާފައިވަނީ ބޭންކުގެ ކަސްޓަމަރެއްގެ އެކައުންޓަކުން ނޫންކަން ވެސް ރާއްޖެއެމްވީއަށް ވަނީ އެނގިފައެވެ. ރާއްޖެއެމްވީއަށް އެނގިފައިވާ ގޮތުގައި އެކި ފަހަރުތަކުގެ މަތިން 10 މިލިއަން ރުފިޔާ ނަގާފައި ވަނީ ބީއެމްއެލްގެ އަމިއްލަ އެކައުންޓަކުންނެވެ. އެއީ އެ ބޭންކްގެ އެތެރޭގެ އޮޕަރޭޝަންތަކަށް ބޭނުންކުރާ އެކައުންޓެކެވެ. މި މައްސަލަ އެނގުނީ، ސަސްޕެންޑްކޮށްފައިވާ ދެމަފިރިންގެ ދިރިއުޅުމަށް އައި ކުއްލި ބަދަލާއި، އަދި މުވައްޒަފުންގެ ފަރާތުން ހުށަހެޅި ޝަކުވާތައް ބޭންކްގެ އެތޭރެގެ ތަހްގީގުން ބެލުމުން ކަމަށް ރާއްޖެއެމްވީއަށް ވަނީ އެނގިފައެވެ.
މި މައްސަލަ ފެންމަތިވުމާ ގުޅިގެން ސަސްޕެންޑްކުރި ދެ މުވައްޒަފުންގެ ސޯޝަލް މީޑިއާގެ އެކައުންޓްތައް ވަނީ ޑިއެކްޓިވޭޓްކޮށްފައެވެ.
މި މައްސަލަ ޕޮލިހަށް ފޮނުވިކަން އަދި ކަށަވަރެއް ނުވެއެވެ.
