އެއްމާބަނޑު ދެ ކުދިންނާ އެކު ރަޝްފާ މަރުވި މައްސަލަ ހެލްތުން ބަލަނީ
ފުލުހުންނަށާއި ހެލްތަށް މައްސަލަ ހުށަހަޅާފައިވޭ
އުމުރުން 21 އަހަރުގެ ރަޝްފާ އަހުމަދު: ބަނޑުގައި އޮތް ދެ ދަރިންނާ އެކު ރަޟްފާ މަރުވީ މިދިޔަ މަހުގެ 29 ގައި
އެއްމާބަނޑު ދެ ކުދިންނަށް ބަލިވެ އިން ޒުވާން އަންހެން ކުއްޖަކު ކ. މާފުށީގައި މަރުވި މައްސަލާގައި އެ ރަށު ސިއްހީ މަރުކަޒުގެ އިހްމާލެއް އޮތްތޯ ހެލްތު މިނިސްޓްރީން ބަލަން ފަށައިފިއެވެ.
ބަނޑަށް އަށް މަހުގައި އެއްމާބަނޑު ދެ ކުދިންނާ އެކު މިދިޔަ މަހުގެ 29 ވަނަ ދުވަހު މާފުށީގައި މަރުވީ އެ ރަށު ޒުވާނަކާ އިނދެގެން އުޅޭ ފުވައްމުލަކު ހޯދަނޑު، އޯޝަންވިލާ، ރަޝްފާ އަހުމަދު (ރަޝް), 21, އެވެ. އޭނާ މަރުވީ ހުންގަދަވުމުން މާފުށީ ސިއްހީ މަރުކަޒުން ފަރުވާ ހޯދާފައި ވަނިކޮށް، ޖެހިގެން އައި ދުވަހުގެ ފަތިހުގެ ވަގުތެއްގައި ފިޓުޖެހިގެންނެވެ.
ރަޝްފާ އާއިލާއިން މީޑީއާތަކުގައި ބުނެފައި ވަނީ އޭނާ ކެއްސާތީ، މާފުށީ ސިއްހީ މަރުކަޒަށް ދެއްކި ކަމަށާއި ޑޮކްޓަރުން އޭނާ އަށް ދީފައިވާ ބޭހާ މެދު އާއިލާއިން ޝައްކު އުފެދޭ ކަމަށެވެ. އެ ބޭސް ކޭ ފަހުން، ދަންވަރު އާދަޔާ ހިލާފަށް ހޮޑުލައި ސިއްހީ ހާލަތު ގޯސްވެ، މަރުވީ ކަމަށް ރަޝްފާގެ އާއިލާއިން ބުނެފައިވެއެވެ.
ރަޝްފާއަށް ދިން ބޭސްތަކާ މެދު ސުވާލު އުފައްދައި، އާއިލާއިން ވަނީ އެ މައްސަލަ ފުލުހުންނަށާއި ހެލްތު މިނިސްޓްރީއަށް ހުށަހަޅާފައެވެ.
ހެލްތު މިނިސްޓްރީގެ އިންފޮމޭޝަން އޮފިސަރު "ރާއްޖެއެމްވީ"އަށް ވިދާޅުވީ ހެލްތު މިނިސްޓްރީއަށް އާއިލާ އިން އެ މައްސަލަ ހުށަހެޅުމުގެ ކުރިން އެ މިނިސްޓްރީގެ ހެލްތު އެޝުއަރެންސް ސެކްޝަނުން އެ މައްސަލަ ބަލަމުންދާ ކަމަށެވެ. އެ ސެކްޝަނުން ބަލަމުންދަނީ ރަޝް އާއި އޭނާގެ ބަނޑުގައި އޮތް ދެ ދަރިން މަރުވީ ޑޮކްޓަރެއްގެ އިހްމާލުންތޯ ނުވަތަ ނަރުހުންގެ އިހްމާލުންތޯ އަދި އެކަން މެދުވެރިވީ އެހެން ގޮތަކުންތޯ ބަލަމުންދާ ކަމަށް އޮފިޝަލް ވިދާޅުވިއެވެ.
ފަސްހާހަށް ވުރެ ގިނަ މީހުން ދިރިއުޅޭ މާފުށީ ސިއްހީ މަރުކަޒުގެ ހާލަތާ ގުޅޭ ގޮތުން މާފުށީ ކައުންސިލުން ވެސް ވަނީ ކަންބޮޑުވުން ފާޅުކޮށްފައެވެ. އެ ކައުންސިލްގެ ރައީސް އުސްމާން ރަޝީދު ބުނީ ބޮޑު އާބާދީއަކަށް އެކަށީގެންވާ ހިދުމަތްތަކެއް އެ ރަށުގެ ސިއްހީ މަރުކަޒުގައި ނެތް ކަމަށާއި ޒަހަމްވެފައި ހުންނަ ތަނެއް، "ފަހާލާނެ ރޮނދި ކޮޅެއް" އަދި އޮކްސިޖަން ފުޅިއެއް ވެސް އެތަނުގައި ނުހުންނަ ކަަމަަށެވެ.
ގެސްޓުހައުސް ވިޔަފާރި ކުރި އަރާފައިވާ، މާފުށިން ކޮންމެ އަހަރަކު ރެކޯޑު އަދަދަކަށް ދައުލަތަށް ޓެކްސް ދައްކަމުންދާއިރު ވެސް ސިއްހީ މަރުކަޒު ހާލަތާއި ރަށުގެ ތަރައްގީއަށް ދައުލަތުން ހޭދަ ނުކުރާތީ، ބައެއް މީހުން ދަނީ ކަންބޮޑުވުން ފާޅުކުރަމުންނެވެ. މިދިޔަ އަހަރު މާފުށީ ގެސްޓު ހައުސްތަކުން ދައުލަތަށް ވަނީ 150 މިލިއަން ރުފިޔާގެ ޓެކްސް ދައްކާފައެވެ. ނަމަވެސް އެ ރަށު ކައުންސިލްގެ ބަޖެޓަށް ވެސް ދައުލަތުން ދީފައި ވަނީ ދެ މިލިއަން ރުފިޔާއެވެ.
