ނަޝީދު އިންތިހާބު ކާމިޔާބު ކުރައްވާނެ: މަހުލޫފު
މިނިސްޓަރު މަހުލޫފާއި އަލީ ވަހީދު
ރައްޔިތުންގެ މަޖިލީހުގެ މައްޗަންގޮޅީ މެދު ދާއިރާއަށް ވާދަ ކުރައްވާ ކުރީގެ ރައީސް މުހައްމަދު ނަޝީދަށް މަޖިލީހަށް ވާދަ ނުކުރެއްވޭ ގޮތަށް ދިއްދޫ ދާއިރާގެ މެމްބަރު އަބްދުއްލަތީފު މުހައްމަދު ހުށަހެޅުއްވި އިސްލާހާ ދެކޮޅަށް ޔޫތު މިނިސްޓަރު އަހުމަދު މަހުލޫފާއި ޓޫރިޒަމް މިނިސްޓަރު އަލީ ވަހީދު ތެދުވެވަޑައިގެންފި އެވެ.
މަހުލޫފު އަންގާރަ ދުވަހު ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ އިންތިހާބުގައި ރައީސް ނަޝީދު ވާދަ ކުރައްވާނެ ކަމަށާއި އިރާދަ ކުރެއްވިއްޔާ ބޮޑުތަނުން އެމަނިކުފާނު އިންތިހާބު ކާމިޔާބު ކުރައްވާނެ ކަމަށެވެ.
މިނިސްޓަރު އަލީ ވަހީދު ކުރެއްވި ޓްވީޓެއްގައި ވިދާޅުވީ ވަކި މީހަކަށް ވަކި ގޮތެއް ހެދުމާއި ވާދަވެރިޔާ ނައްތާލުމުގެ ސަގާފަތާ އެންމެންވެސް ދުރުވާން ޖެހޭ ކަމަށެވެ. ރައީސް ނަޝީދު މަޖިލީހަށް ކުރިމަތިލުމަކީ އެމަނިކުފާނުގެ ގާނޫނީ އަދި އަސާސީ ހައްގެއް ކަމަށާއި ރާއްޖެ އިސްލާހުވެ ބަދަލުވާނީ އަޅުގަޏޑުމެން އެންމެގެ ވިސްނުން އިސްލާހުވެ ހަރުދަނާވެގެން ކަމަށް، އެމްޑީޕީގެ ކުރީގެ ޗެއާޕާސަން އަދި މިހާރު ޖޭޕީގެ ރައީސް އަލީ ވަހީދު ވިދާޅުވިއެވެ.
ރާއްޖޭގެ ރައީސް ކަން ކުރެއްވި އެއްވެސް ބޭފުޅަކަށް މަޖިލީހުގެ އިންތިޚާބުގައި ވާދަ ނުކުރެއްވޭ ގޮތް ހަދަން ޖުމްހޫރީ ޕާޓީގެ ޕާލަމެންޓްރީ ގްރޫޕުގެ މެމްބަރުކަން ވެސް ކުރައްވާ ލަތީފު އިސްލާހެއް ހުށަހެޅުއްވީ އަންގާރަ ދުވަހުއެވެ. ޖުމްހޫރީ ޕާޓީގެ ޕާލަމެންޓްރީ ގްރޫޕުގެ ލީޑަރު އަބްދުﷲ ރިޔާޒު ވިދާޅުވީ އެ އިސްލާހަކީ ޖޮއިންޓް ޕާލަމެންޓްރީ ގްރޫޕާއި ޖޭޕީގެ ޕާލަމެންޓްރީ ގްރޫޕާ މަޝްވަރާކޮށްގެން ހުށަހެޅި އިސްލާހެއް ނޫން ކަަމަށެވެ.
ކުރީގެ ރައީސުންނަށް މަޖިލީހަށް ކުރިމަތިނުލެވޭ ގޮތަށް އިސްލާހު ހުށަހެޅުއްވި ސަބަބެއް ކަމަށް ލަތީފު ވިދާޅުވެފައި ވަނީ ރައީސް ކަން ކުރައްވާފައިވާ ބޭފުޅުންނަކީ ހާއްސަ އިމްޒަތަކާއި ޝަރަފެއް ލިބިދީފައިވާ ބޭފުޅުންނަށް ވާތީ، އެ އަށް ވުރެ ދަށް މަގާމަކަށް ވަޑައިގެންނެވުމުން އެ ޝަރަފަށް އުނިކަން އަންނާނެތީ ކަމަށެވެ.
