ސްޕެނިޝް ލަލީގާ: ރެއާލް އާއި ބާސާއަށް މުހިންމު މޮޅެއް

އާދީއްތަ ދުވަހުގެ ރޭ ކުޅުނު މެޗު ރެއާލުން ކާމިޔާބުކުރީ ރެއާލް ބެޓިސްއާ ވާދަކޮށް 1-2 ގެ ނަތީޖާއަކުންނެވެ.

ބެޓިސް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ރެއާލުންނެވެ. އެގޮތުން އެ ޓީމުން ވަނީ ގިނަ ހަމަލާތަކެއް ބެޓިސްގެ ގޯލަށް ފޮނުވާލާފައެވެ.

ރެއާލުން މެޗުގެ ލީޑު ނެގީ 13 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ދުނިޔޭގެ މޮޅު ކުޅުންތެރިޔާ ކްރޮއޭޝިއާގެ ލޫކަ މޮޑްރިޗްއެވެ.

މި ލަނޑަށް ފަހު ވެސް ރަނގަޅަށް ކުޅެމުންދިޔައީ ރެއާލުންނެވެ. އެގޮތުން އެޓީމުން ދިޔައީ ފުލުފުލުގައި ލަނޑު ޖެހުމަށް ފުރުސަތު ތަނަވަސްކުރަމުންނެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ބެޓިސްގެ މައްޗަށް ރެއާލް ކުރީގައި އޮވެގެންނެވެ.

ދެވަނަ ހާފް ފެށިގެން ބެޓިސްއިން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު 68 ވަނަ މިނެޓުގައި އެޓީމަށް ކާމިޔާބުކޮށްދިނީ ކަނެލަސްއެވެ.

ނަމަވެސް ރެއާލުން ވަނީ އެޓީމުގެ އެޓޭކްތައް ވަރުގަދަކޮށް މެޗު ނިމެން ދެ މިނެޓަށް ވެފައިވަނިކޮށް އަނބުރާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކެބަލޯސްއެވެ.

މި ނަތީޖާއާ އެކު ރެއާލުން ވަނީ 19 މެޗުން 33 ޕޮއިންޓް ހަމަކޮށް ތިންވަނައިގައި އޮތް ސެވިއްޔާއާ ޕޮއިންޓްގެ ގޮތުން ހަމަހަމަކޮށްފައެވެ. ރެއާލްއަށް ހަތަރުވަނަ ލިބުނީ ލަނޑުގެ ތަފާތުންނެވެ.

އާދީއްތަ ދުވަހުގެ ރޭ ކުޅުނު މެޗުން ބާސާ މޮޅުވީ އެއިބާއާ ވާދަކޮށް 0-3 ގެ ނަތީޖާއަކުންނެވެ.

ބާސާ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެ ޓީމުންނެވެ. އެގޮތުން 19 ވަނަ މިނެޓުގައި ފިލިޕޭ ކުޓީނިއޯގެ އެހީތެރިކަމާ އެކު ލުއިސް ސުއަރޭޒް ކާމިޔާބުކުރި ލަނޑުން އެ ޓީމުން ވަނީ ލީޑު ނަގާފައެވެ.

މި ލަނޑަށް ފަހު ވެސް ރަނގަޅަށް ކުޅެމުންދިޔައީ ބާސާއިންނެވެ. އެގޮތުން ލަނޑު ޖެހުމަށް ގިނަ ފުރުސަތުތަކެއް އެޓީމުން ވަނީ ތަނަވަސްކޮށްފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން އެއިބާގެ މައްޗަށް ބާސާ ކުރީގައި އޮވެގެންނެވެ.

ދެވަނަ ހާފް ފެށިގެން ބާސާއިން ވަނީ ލީޑު ފުޅާކޮށްފައެވެ. މި ލަނޑު ސުއަރޭޒްގެ އެހީތެރިކަމާއެކު ކާމިޔާބުކުރީ ލިއޮނެލް މެސީއެވެ. މިއީ އޭނާ ސްޕެނިޝް ލީގުގައި ކާމިޔާބުކުރި 400 ވަނަ ލަނޑެވެ.

ބާސާގެ ތިންވަނަ ލަނޑު ސާޖިއޯ ރޮބާޓޯގެ އެހީތެރިކަމާއެކު ކާމިޔާބުކުރީ ސުއަރޭޒްއެވެ. މި ލަނޑަށްފަހުވެސް ބާސާއަށް ލަނޑު ޖެހުމަށް ގިނަ ފުރުސަތުތަކެއް ލިބި ވަނީ ބޭކާރުވެފައެވެ.

މި ނަތީޖާއާ އެކު ބާސާ އޮތީ ކުޅުނު 22 މެޗުން ލިބުނު 43 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި އެއިބާ އޮތީ ކުޅުނު 19 މެޗުން ލިބުނު 22 ޕޮއިންޓާއެކު ޕޮއިންޓް ތާވަލުގެ 16 ވަނައިގައެވެ.