ސިނާއީ ސަރަހައްދުގައި އެކްސިޑެންޓެއް ހިނގައި ޒުވާނަކަށް އަނިޔާވެއްޖެ
11 ޖެނުއަރީ 2019 | ހުކުރު 17:51އަނިޔާވީ 21 އަހަރުގެ ފިރިހެނަކަށް
ޕާކު ކޮށްފައި ޓެކްސީގައި ސައިކަލު ޖެހި ހިނގި އެކްސިޑެންޓް
މާލޭގެ ސިނާއީ ސަރަހައްދުގައި ނުރައްކާތެރި އެކްސިޑެންޓެއް ހިނގައި ޒުވާނަކަށް އަނިޔާވެއްޖެއެވެ.
ފުލުހުންގެ މީޑިއާ އޮފިސަރު ވިދާޅުވީ ސިނާއީ ސަރަހައްދުގެ ޕެޓްރޯލް ޝެޑް ކައިރިން އިރުއޮއްސި 6:00 ހާއިރު ނުރައްކާތެރި އެކްސިޑެންޓެއް ހިނގިކަމުގެ ރިޕޯޓު ލިބިފައިވާ ކަމަށެވެ. މިހާދިސާ ހިނގީ ޕާކުކޮށްފައި އޮތް ކާރެއްގައި ދުއްވާފައިވާ އައި ސައިކަލު ޖެހިގެން ކަމަށް އޮފިސަރު ވިދާޅުވިއެވެ.
މީގެ އިތުރުން އޮފިސަރު މިއެކްސިޑެންޓުގައި އަނިޔާވީ 21 އަހަރުގެ ފިރިހެނަކަށް ކަމަށާއި، އޭނާ އަށް އައިޖީއެމްއެޗްގައި ފަރުވާ ދެމުން އަންނަ ކަމަށެވެ. ނަމަވެސް ސިއްހީ ހާލަތާ ގުޅޭ އިތުރު ތަފްސީލެއް ނުލިބެއެވެ.
މިއަދު ހިނގި މިއެކްސިޑެންޓުގެ ޓެކްސީގެ ކުރީކޮޅުން ބައެއް ވަނީ ހަލާކުވެފައެވެ. އަދި ޒުވާނާ ދުއްވާފައި ދިޔަ ސައިކަލަށް ވެސް ބޮޑެތި ގެއްލުންތަކެއްވެ، ސައިކަލްގެ ފުރޮޅާއި ކުރީކޮޅު ވަނީ ފުނޑުފުނޑުވެފަ އެވެ.
ފުލުހުން މިހާރު ދަނީ މި މައްސަލަ ތަހުގީގު ކުރަމުންނެވެ.
