ރަންވީރުގެ 'ގަލީ ބޯއީ'ގެ ފުރަތަމަ ޓްރެއިލާ ރިލީޒްކޮށްފި

ކާމިޔާބު ގިނަ ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ މަޝްހޫރު އެކްޓަރު ރަންވީރު ސިންގް ދެން އެންމެ އަވަހަށް ފެނިގެންދާ "ގަލީ ބޯއީ'ގެ ފުރަތަމަ ޓްރެއިލާ ރިލީޒްކޮށްފިއެވެ.

ރަންވީރުގެ އެންމެ ކާމިޔާބު ފިލްމު 'ސިމްބާ' މިހާރު ވެސް ސިނަމާގައި ކުރިއަށްދާއިރު އޭނާ ދެން އެންމެ އަވަހަށް ފެނިގެންދާ "ގަލީ ބޯއީ"ގައި ފެނިގެންދަނީ މަގުމަތީގައި ރެޕް މިއުޒިކް ކުޅޭ މީހެއްގެ ރޯލުންނެވެ. ޓްރެއިލާއަށް ގިނަ ބައެއްގެ ތަރުހީބު ލިބެމުންދާއިރު، ރަންވީރު ވަނީ ޓްރެއިލާގައި ފެނިގެންދާ އޭނާގެ އެކްޓިންއަށް ތައުރީފްކުރި މީހުންނަށް ޝުކުރުއަދާކޮށްފައެވެ.

ޒޯޔާ އަޚްތަރުގެ މި ފިލްމުގައި ރަންވީރާ އެކު ފެނިގެންދާނީ އާލިޔާ ބަޓެވެ. މިއީ މި ދެތަރިން އެކުގައި ފެނިގެންދާ ފުރަތަމަ ފަހަރެވެ.

ފެބްރުއަރީ 14، 2019 ވަނަ ދުވަހު ރިލީޒް ކުރުމަށް ތައްޔާރުވަމުންދާ މިފިލްގެ ފުރަތަމަ ޕޯސްޓަރުގައި ފެނިގެންދަނީ ކޯރިއެއް އަޅައިގެން ފުރަގަހުން ނަގާފައިވާ ފޮޓޯއެކެވެ.

"ގަލީ ބޯއީ" ވަނީ 69 ވަނަ ބާރލިން އިންޓަރނޭޝަނަލް ފިލްމު ފެސްޓިވަލްގައި ޕްރިމިއަރ ކުރުމުގެ ފުރުޞަތު ވެސް ލިބިފައެވެ.

މި ފިލްމުގެ މައިގަނޑު ވާހަކަ ބިނާކޮށްފައިވަނީ މުމްބާއީ މަގުމަތީގައި މިއުކިޒު ކުޅުމަށް ހަރަކާތްތެރިވާ ސްޓްރީރް ރެޕާސްއިންގެ މައްޗަށެވެ.