މިދިޔަ އަހަރު އެންމެ ގިނައީ ވައްކަން، އިތުރުވީ މަސްތުވާތަކެތީގެ މައްސަލަތައް

މިދިޔަ އަހަރު ފުލުހުންނަށް ހުށަހެޅި މައްސަލަތަކުގެ ތެރެއިން އެންމެ ގިނައީ މަސްތުވާތަކެތީގެ މައްސަލަތައް ކަމަށް ފުލުހުން ބުނެފި އެވެ.

އިސްކަންދަރުކޮށީގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ފުލުހުންގެ ތަރުޖަމާނު ޗީފް އިންސްޕެކްޓާ އޮފް ޕޮލިސް އިޒްމިއާ ޒާހިރު ވިދާޅުވި ގޮތުގައި މަސްތުވާތަކެތީގެ މައްސަލަތައް ފިޔަވައި އެހެން މައްސަލަތައް ވަނީ ދަށްވެފަ އެވެ. މިދިޔަ އަހަރާ އަޅައިބަލާއިރު، މަސްތުވާތަކެތީގެ 194 މައްސަލައެއް ވަނީ އިތުރުވެފައިވެ އެވެ.

ނަމަވެސް މިދިޔަ އަހަރު އެންމެ ގިނައިން ފުލުހަށް ހުށަހަޅާފައިވަނީ ވައްކަމުގެ މައްސަލަ އެވެ. އެއީ 3270 މައްސަލަ އެވެ. މަސްތުވާތަކެތީގެ 2230 މައްސަލައެއް ހުށަހަޅާފައިވާއިރު، މަގުމަތީގެ އެކްސިޑެންޓްތަކުގެ 2007 މައްސަލަ މިދިޔަ އަހަރު ހުށަހަޅާފައިވެ އެވެ. މަކަރާއި ހީލަތުގެ 516 މައްސަލައެއް ހުށަހަޅާފައިވާއިރު، ފޭރުމުގެ 537 މައްސަލައެއް އަދި މާރާމާރީގެ 754 މައްސަލައެއް މިދިޔަ އަހަރު ހުށަހަޅާފައިވެ އެވެ.

"ދެހާ އަށާރަ ވަނަ އަހަރު މާރާމާރީ، ވައްކަން، ފޭރުން، މަކަރާ ހީލަތް ހެދުން އަދި ޓްރެފިކް އެކްސިޑެންޓްގެ މައްސަލަތައް ދަށްވެފައިވާކަން ފާހަގަ ކުރެވޭ، 2017 ވަނަ އަހަރާއި 2018 ވަނަ އަހަރާ އަޅާބަލާއިރު ފުލުހުނަށް ހުށައަޅާފައިވާ މައްސަލަތަކުގެ އަދަދު ވަނީ ތިން ޕަސެންޓް ދަށްވެފައި. ތަހްގީގު ކުރުމަށް ފަހު ފޮނުވި އަދަދުވެސް 2017 ވަނަ އަހަރާއި 2018 ވަނަ އަހަރާ އަޅާބަލާއިރު 2018 ވަނަ އަހަރު ވަނީ 20 ޕަސެންޓް ދަށްވެފައި." އޭނާ ވިދާޅުވި އެވެ.

މަސްތުވާތަކެތީ މައްސަލަތައް އިތުރުވެފައިވާ ސަބަބާ ގުޅޭ ގޮތުން އިޒުމިއާ ވިދާޅުވީ މަސްތުވާތަކެތި ބޭނުންކުރުމުގެ މައްސަލަތަކުގައި އެއްބަޔަކު އުޅޭކަން ފާހަގަ ކުރެވޭ ކަމަށެވެ. އެންމެ ބޮޑު ސަބަބަކީ މަސްތުވާތަކެތި ބޭނުންކުރަމުންދާ މީހުން މުޖުތަމައަށް ދޫށްލާފައި ތިބުން ކަމަށެވެ.

އަޒްމިޔާ ވިދާޅުވީ 10 އަތޮޅަކުން ފުލުހުންނަށް ހުށައެޅުނު މައްސަލަތައް މިދިޔަ އަހަރު އޭގެ ކުރީ އަހަރާ އަޅާ ބަލާއިރު ވަނީ އިތުރުވެފައި އެވެ. ނުވަ އަތޮޅެއްގައި ފުލުހުނަށް ހުށައެޅުނު މައްސަތައް ވަނީ މަދުވެފައި އެވެ. އެއް އަހަރުން އަނެއް އަހަރަށް މައްސަލަތައް މަދުވުމާއި ގިނަވުމުގައި ގިނަ ސަބަބުތަކެއް ހުންނަ ކަމަށް ފާހަގަ ކުރައްވައި އޭނާ ވިދާޅުވީ އޭގެ ސަބަބުތައް ބެލުމަށް ދިރާސާތައް ކުރާނެ ކަމަށެވެ.