އަހަރުގެ ފުރަތަމަ ފަސް ދުވަހު ސަރުކާރުގެ ހަރަދު: އެންމެ 4000 ރުފިޔާ
8 ޖެނުއަރީ 2019 | އަންގާރަ 08:14ހަރަދުކޮށްފައިވަނީ ސަރުކާރުގެ 4 އިދާރާއަކުން
ފިނޭންސް މިނިސްޓަރު އިބްރާހިމް އަމީރު
ޖެނުއަރީ މަހުގެ ފުރަތަމަ ފަސް ދުވަހު ސަރުކާރުން ހޭދަކުރީ 4,000 ރުފިޔާ ކަމަށް ފިނޭންސް މިނިސްޓްރީގެ ހިސާބުތަކުން ދައްކައިފިއެވެ.
ފިނޭންސް މިނިސްޓްރީން ކޮންމެ ހަފްތާއަކު އެއް ފަހަރު ނެރޭ މާލީ ރިޕޯޓުން ދައްކާ ގޮތުގައި މިދިޔަ ހަފްތާގައި ހަރަދުކޮށްފައި ވަނީ ސަރުކާރުންގެ އެންމެ ހަތަރު އިދާރާއަކުންނެވެ.
ދައުލަތުގެ ބަޖެޓުން ހަރަދުތައް މެނޭޖުކުރާ 52 އިދާރާ ހިމެނޭއިރު، ޖެނުއަރީ މަހުގެ ފުރަތަމަ ފަސް ދުވަހު ހޭދަކޮށްފައިވަނީ 4،013 ރުފިޔާއެވެ. އެގޮތުން ހޯމް މިނިސްޓްރީން 2،600 ރުފިޔާ، ހެލްތު މިނިސްޓްރީން 1،243 ރުފިޔާ ހަރަދުކޮށްފައިވެ އެވެ. އަދި ޓެކްސް އެޕީލް ޓްރައިބިއުނަލް އިން 95 ރުފިޔާގެ އިތުރުން މޯލްޑިވްސް އިންލެންޑް ރެވެނިއު އޮތޯރިޓީން 75 ރުފިޔާ ހަރަދުކޮށްފައިވެ އެވެ.
ރައީސް ސޯލިހު ސަރުކާރުގެ މިއަހަރުގެ ބަޖެޓަކީ 30.2 ބިލިއަން ރުފިޔާ އެވެ. އޭގެ ތެރެއިން އާމްދަނީގެ ގޮތުގައި ދައުލަތަށް 23.2 ބިލިއަން ރުފިޔާ ކަމަށް ލަފާކޮށްފައިއެވެ.
