ވ.ފުލިދޫ ކަނޑުތެރެއިން ދިޔަވަމުން އައި މޯލްޑިވިސް އެކްސްޕްލޯރާ ނަމަކަށް ކިޔާ ސަފާރީ ބަނދަރުކުރުމަށް ދަތުރުފަށައިފިއެވެ.
އެމްއެންޑީއެފުން ބުނީ މި ހާދިސާ ހިނގާފައިވަނީ މިއަދު 11:20 ގައި ކަމަށާއި، ދިޔަވަމުން ދިޔައީ ސަފާރީގެ ކުރީކޮޅު ފަޅައިގެން ދިޔުމުންކަމަށެވެ. ސަފާރީގެ ކެޕްޓަން އެމްއެންޑީއެފް ކޯސްޓްގާޑް އަށް މައުލޫމާތު ދެމުން ބުނެފައިވަނީ ސަފާރީގެ ކޮޅު ފަޅައިގެން ދިޔައީ ލަކުޑި ފީވެގެންކަމަށެވެ.
މިއީ ފުލިދޫއިން މާލެ އައުމަށް 16 ފަތުރުވެރިންނާއި، 8 ފަޅުވެރިންނާއެކު ދަތުރުކުރި ސަފާރީއެކެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާއިރު، ހާދިސާގެ ހަބަރު ލިބުމާއެކު ފިހާޅޮހި ރިސޯޓުން ވަނީ އެހީތެރިކަން ފޯރުކޮށްދީފައެވެ.
އެމްއެންޑީއެފުން ބުނެފައިވަނީ މޯލްޑިވިސް އެކްސްޕްލޯރާއިން އެހީތެރިކަމަށް އެދިފައިވަނީ އެ ސަފާރީގެ ޖެނެރޭޓަރުގެ މައްސަލައެއް ޖެހިގެންކަމަށާއި، ސަފާރީ މިހާރު ދިޔަ ނުވާ ކަމަށެެވެ. އެގޮތުން ސަފާރީ ބަނދަރުކުރުމަށް މިހާރު ދަތުރު ފަށާފައިވާ ކަމަށްވެސް އެމްއެންޑިއެފުން ބުނެއެވެ.
މޫސުން ގޯސްވެ ކަނޑުގަދަވުމުގެ ސަބަބުން ކަނޑުމަތީގެ ހާދިސާ ގިނަވަމުންދާތީ ކަނޑުދަތުރުކުރަމުން ދާ ފަރަތްތަކުން ސަމާލުކަންދިނުމަށް އެމްއެންޑީއެފް ވަނީ އިލްތިމާސްކޮށްފައެވެ.
