މަޝްހޫރުކަން ހޯދާފައިވާ ރާއްޖޭގެ ގިލި ލަންކަންފުށި ރިސޯޓްގައި ބުދަ ދުވަހުގެ ރޭ ހިނގި އަލިފާނުގެ ހާދިސާއާ އެކު އެ ރިސޯޓް ހުއްޓުމަކަށް އަތުވެއްޖެއެވެ.

ބުދަ ދުވަހުގެ ރޭ 22:30 ހާއިރު މާލެ އަތޮޅު ގިލި ލަންކަންފުށި ރިސޯޓްގައި ހިނގި އަލިފާނުގެ ހާދިސާގައި ހަތް ވޯޓާ ވިލާ އާއި އެރަށުގެ ރެސްޓޯރެންޓްގެ އިތުރުން ސްޓޯރު ވަނީ އަނދާ އަޅިއަށް ވެފައެވެ.

ޖުމްލަ 230 ވަރަކަށް މުވައްޒަފުން މަސައްކަތް ކުރަމުން އަންނަ އެ ރިސޯޓުގައި އެންމެ ފުރަތަމަ އަލިފާން ރޯވެފައި ވަނީ އެ ރަށުގެ އެންމެ އަގު ބޮޑު ކޮޓަރި ''ކްރޫޒޯ ރެޒިޑެންސް'' ގައެވެ.

އެ ރިސޯޓުގެ އިސް ބޭފުޅަކު ރާއްޖެ އެމްވީއަށް މަައުލޫމާތު ދެއްވަމުން ވިދާޅުވީ، ކްރޫޒޯ ރެޒިޑެންސް ތިބި ގެސްޓުން އެ ގަޑީގައި ތިބީ ކޮޓަރިން ބޭރުގައި ކަމަށާއި، ގެސްޓުން ތިބީ ރަށު ތެރޭގައި ކަމަށެވެ.

އެގޮތުން ރާއްޖެއެމްވީ އަށް މައުލޫމާތު ދެއްވި އެ ރިސޯޓްގެ އޮފިޝަލަކު ވިދާޅުވީ، ފަޔާ އެލާމް އަޅަން ފެށުމާ އެކު ހުރިހާ މުވައްޒަފުންނަށާއި، ގެސްޓުންނަށް އެންގި ކަމަށާއި، އަދި އަލިފާން ރޯވާން ދިމާވީ ކަރަންޓް ޝޯޓެއް ވެގެން ކަމަށް ލަފާކުރެވޭ ކަމަށެވެ. އާ އަހަރު ފާހަގަ ކުރުމަށްޓަކައި ރިސޯޓްގައި 99 ފަތުރުވެރިން ތިބި ކަމަށް ވެސް އޭނާ ވިދާޅުވިއެވެ. 

މީގެ އިތުރުން މުވައްޒަފު ވިދާޅުވީ، އާ އަހަރު ފާހަގަކުރުމަށް 99 ފަތުރުވެރިން ތިބި ގިލިލަންކަންފުށި ރިސޯޓުގައި އަލިފާން ރޯވި ސަރަހައްދު މިހާރު ބަންދު ކޮށްފައިވާ ކަމަށާއި، އެ ސަރަހައްދުގައި ފުލުހުންގެ އިތުރުން އެމްއެންޑީއެފުން ވެސް ހަރަކާތްތެރި ވަމުންދާ ކަމަށެވެ. އަދި ރިސޯޓު މިހާރު ހުއްޓުމަކަށް އައިސްފައިވާ ކަމަށް ވެސް އޭނާ ވިދާޅުވިއެވެ. 

ރާއްޖެއެމްވީއަށް މައުލޫމާތު ދެއްވަމުން ގިލިލަންކަންފުށި ރިސޯޓުގެ މާކެޓިންގް އެންޑް ކޮމިއުނިކޭޝަން މެނޭޖަރު ޓެމީ ގެން ވިދާޅުވީ، ރިސޯޓުގައި ތިބި ހުރިހާ ފަތުރުވެރިން އެހެން ރިސޯޓްތަކަށް ބަދަލުކޮށްފައިވާ ކަމަށާއި، ހުރިހާ ފަތުރުވެރިންގެ ހާލު ވެސް ރަނގަޅު ކަމަށެވެ. 

އަލިފާން ރޯވުމާ އެކު ރިސޯޓުގެ މެނޭޖްމެންޓްގެ އިސް ބޭފުޅުންނާއި، ވެރިފަރާތާ ގުޅިގެން އެކްޝަން ޕްލޭނެއް އެކުލަވައިލުމުގެ މަސައްކަތް މިހާރު ކުރިޔަށްދާ ކަމަށާއި، އެކަމާ ބެހޭ މައުލޫމާތު ވަރަށް އަވަހަށް މީޑިއާ އަށް ހިއްސާކުރައްވާނެ ކަމަށް ވެސް ޓެމީ ވަނީ ވިދާޅުވެފައެވެ. 

ޖުމްލަ 45 ކޮޓަރި ހުންނަ ފަސް ތަރީގެ ގިލިލަންކަންފުށި ރިސޯޓަށް ބޮޑު ގެއްލުމެއް ލިބިފައިވާއިރު، އެއީ ކިހާވަރެއްގެ ގެއްލުމެއްތޯ ބެލުމުގެ މަސައްކަތް ކުރަމުންދާ ކަމަށާއި، ސަރުކާރުގެ އިތުރުން ޓޫރިޒަމްގެ އިސް އޮފިޝަލުން ވެސް ރިސޯޓުގައި ހަރަކާތްތެރިވަމުންދާ ކަމަށް އޭނާ ވިދާޅުވިއެވެ.  

ރިސޯޓް މުވައްޒަފުންގެ އެހީތެރިކަމާ އެކު އެމްއެންޑީއެފުން އަލިފާން ނިއްވާލާފައި ވަނީ ބުދަ ދުވަހުގެ ރޭ ފަތިހު ފަހެއް ޖެހިއިރު ކަމަށް އެމްއެންޑީއެފުން މައުލޫމާތުދެއެވެ. މި އަލިފާނުގެ ހާދިސާގައި ދުމުގެ އަސަރުކުރި ރިސޯޓުގެ ދެ މުވައްޒަފަކާއި، އެމްއެންޑީއެފް މީހަކަށް ވަނީ އޭޑީކޭ ހޮސްޕިޓަލުގައި ފަރުވާ ދީފައެވެ.