ގިލިލަންކަންފުށީގައި ރޯވި ހާދިސާއާ ގުޅިގެން ފަރުވާއަށް ތިން މީހަކު މާލެ ގެނެސްފި
2 ޖެނުއަރީ 2019 | ބުދަ 22:27ފަރުވާ ދިނުމަށް ގެނައީ ސިފައިންގެ މީހަކާއި، އެރިސޯޓުގައި މަސައްކަތް ކުރާ ދެމުއައްޒަފެއް
ރިސޯޓުގައި ރޯވެފައިވާ އަލިފާންގަނޑު
ގިލި ލަންކަންފުށީގައި އަލިފާން ރޯވި ހާދިސާގައި ތިން މީހަކަށް ފަރުވާ ދިނުމަށް މާލެ ގެނެސްފިއެވެ.
ފަރުވާ ދިނުމަށް މާލެ ގެނެސްފައި ވަނީ އަލިފާން ނިންމުވުމުގައި ހަރަކާތްތެރިވި ސިފައިންގެ މީހަކާއި އެ ރިސޯޓުގައި މަސައްކަތް ކުރާ ދެ މުއައްޒަފެކެވެ.
ނަމަވެސް އެ މީހުންނަށް ލިބުނު ގެއްލުންތަކުގެ ތަފްސީލު ވަނީ ލިބޭ ގޮތް ނުވެފައެވެ.
ގިލި ލަންކަންފުށިން ބުނީ ބުދަ ދުވަހުގެ ރޭ 10:30 ހާއިރު އަލިފާނުގެ ހާދިސާ ކޮންޓްރޯލް ކުރުމަށް އެމްއެންޑީއެފް ފަޔަރ އެންޑް ރެސްކިއު ޓީމާއެކު މަސައްކަތް ކުރެވިފައިވާ ކަމަށެވެ.
އެ ރިސޯޓުން ބުނީ އަލިފާނުގެ ސަބަބުން ދިމާވެދާނެ ކަމަކަށް ބައެއް ގެސްޓުން އެހެން ރިސޯޓުތަކަށް ބަދަލުކޮށް އެކޮމަޑޭޝަން ހަމަޖައްސައި، ރައްކާތެރި ތަންތަނަށް ބަދަލުކޮށްފައިވާ ކަމަށެވެ.
ރިސޯޓުގެ ނުވަ ވޯޓާ ވިލާގައި ރޯވުމާ ގުޅިގެން އެ ކޮޓަރިތައް ވަނީ އެއްކޮށް އަނދާފައެވެ. އަދި އަލިފާން ރޯވި ސަބަބު ވެސް އަދި ނޭނގެއެވެ.
