ކަރަކަޓައު އަލިފާން ފަރުބަދަ ގޮވުން: އަދިވެސް އިތުރު ސުނާމީއެއްގެ ބިރުވެރިކަމުގައި

ކަރަކަޓައު އަލިފާން ފަރުބަދަ ގޮވުމާ ގުޅިގެން އުފެދުނު ސުނާމީގައި ގެއްލުންތަކުން އަރައި ނުގަނެވި އުޅެނިކޮށް އަނެއްކާ ވެސް އިތުރު ސުނާމީއެއް އަތުވެދާނެކަމުގެ ބިރަށް އައްސޭރިފަށުގައި ނުތިބުމަށް ޑިޒާސްޓަރ މެނޭޖްމަންޓް ސެންޓަރުން އަނެއްކާ ވެސް އިންޒާރުކޮށްފިއެވެ.

އަނަކް ކަރަކަޓައު އަލިފާން ފަރުބަދަ ގޮވުމާ ގުޅިގެން އުފެދުނު ސުނާމީގައި މަރުވި މީހުންގެ އަދަދު މަދުވެގެން 429 އަށް އަރާފައިވާ ކަމަށް ޑިޒާސްޓަރ މިޓިގޭޝަން އޭޖެންސީ އިން ބުނެއެވެ.

ޖާވާއަށާއި ސުމަތްރާއަށް ސުނާމީގެ ބޮޑެތި ރާޅުތައް އަރާފައި ވަނީ ހޮނިހިރު ދުވަހުގެ ރޭ 21:30 ހާއިރުއެވެ.

ޑިޒާސްޓަރ މެނޭޖްމަންޓް އޭޖެންސީން ބުނީ ސުނާމީ އަރާފައި ވަނީ ކަރަކަޓޯއާ އަލިފާން ފަރުބަދަ ގޮވައި ކަނޑުއަޑިން ބިންގަޑު ކަނޑައިގެން ގޮސްގެން ކަމަށް ބެލެވޭ ކަމަށެވެ.

ސުންޑަ ސްޓްރެއިޓަކީ ޖަވާ އާއި ސުމަޓްރާއާ ދެމެދުން ޖާވާ ކަނޑާއި އިންޑިއާ ކަނޑު ގުޅުވައިދޭ ކަނޑުއޮޅިއެވެ.

ޑިޒާސްޓަރ މިޓިގޭޝަނުން އެންމެ ފަހުން ބުނެފައިވާ ގޮތުގައި 150 އެއްހާ މީހުން އަދިވެސް ނުފެނިވާއިރު 16،000 އަށްވުރެ ގިނަ މީހުންގެ ގެދޮރު ވަނީ ގެއްލިފައެވެ.

އިތުރު ސުނާމީއެއް އަތުވެދާނެކަމުގެ ބިރަށް އައްސޭރިފަށުގައި ނުތިބުމަށް ޑިޒާސްޓަރ މެނޭޖްމަންޓް ސެންޓަރުން އަދިވެސް އޮތީ އިންޒާރުދީފައެވެ.

ވޭތުވެދިިޔަ ދެ ތިން މަހު އަނަކް ކަރަކަޓޯއާ އަލިފާން ފަރުބަދަައިގެ ހަރަކާތްތައް އިތުރުވެފައިވާއިރު އާދީއްތަ ދުވަހު ވެސް ފަރުބަދަވަނީ ގޮވާފައެވެ.

ހޮނިހިރު ދުވަހު ސުނާމީ އައިސްފައި ވަނީ ހުކުުރު ދުވަހު އަލިފާން ފަރުބަދަ ގޮވުމަށް ފަހުއެވެ.

އިންޑޮނީޝިއާގެ ޖިއޮލޮޖިކް އޭޖެންސީން ބުނީ ހުކުރު ދުވަހު ފަރުބަދަ ގޮވާފައިވާއިރު ފަރުބަދައިގެ ގޮވުން 12 ސިކުންތައް ދެމިގެންގޮސްފައިވާ ކަމަށާއި ފަރުބަދައިން އެރި ދުމާއި އަޅި 400 މީޓަރަށް މައްޗަށް އެރި ކަމަށެވެ.

މަގުތައް ބްލޮކް ވެފައިވާތީ މީހުން ސަލާމަތްކުރުމުމުގެ މަސައްކަތަށް ހުރަސްއެޅިފައިވާއިރު އެންމެ ބޮޑަށް ގެެއްލުން ލިބުނު ސަރަހައްދުތަކަށް ވަނީ ބަރުތަކެތި އުފުލާނެ އިކުއިޕްމަންޓް ފޮނުވާފައެވެ.

ހޯމަ ދުވަހު ބޭއްވި ނޫސްކޮންފަރެންސެއްގައި ނޭޝަނަލް ޑިޒާސްޓަރ މެނޭޖްމަންޓްގެ ތަރުޖަމާނު ސުޓޯޕޯ ޕުރުވޯ ނުގްރޮހޯ ވިދާޅުވީ އަލިފާން ފަރުބަދަ ގޮވުން ނުހުއްޓޭތީ އިތުރު ސުނާމީއެއް އެރުމުގެ ފުރުސަތު އެބަ އޮތް ކަަމަށެވެ.