ހުޅުމާލޭ އަތިރިމަތީގައި ހުރި ކެފޭތައް ހުސްކުރަނީ
24 ޑިސެމްބަރު 2018 | ހޯމަ 06:26އަންނަ ޖެނުއަރީ މަހުގެ 31ގެ ކުރިން އާންމު ރައްޔިތުންނަށް އެސަރަހައްދު ބޭނުން ކުރެވެން ޖެހޭ
ހުޅުމާލެ އަތިރިމަތީ ސަރަހައްދުގައި ހިނގާ ކެފޭތައް
ހުޅުމާލޭ ބީޗް ސަރަހައްދުގައި ކެފޭ، ރެސްޓައުރެންޓްތައް ހިންގަނީ ހުއްދަ ނެތި ކަމަށާއި، އެ ތަންތަން ހުސްކުރަން އިކޮނޮމިކް މިނިސްޓްރީން، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އަށް އިލްތިމާސްކޮށްފިއެވެ.
އިކޮނޮމިކް މިނިސްޓަރު ފައްޔާޒު އިސްމާއިލް ހޯމަ ދުވަހު ކުރެއްވި ޓްވީޓެއްގައި ވިދާޅުވީ ހުޅުމާލޭ ބީޗްގައި ހިންގާ ކެފޭތަކުގެ މައްސަލަ ބެލުމަށްފަހު އެތަންތަން ހިންގަނީ އެޗްޑީސީގެ ހުއްދަ ނެތިކަން ސާފުވެފައިވާ ކަމަށެވެ. އެހެންވެ، 31 ޖެނުއަރީ 2019ގެ ކުރިން އެސަރަހައްދު އާންމު ރައްޔިތުންނަށް ފުރިހަމަ ގޮތުގައި ބޭނުން ކުރެވޭ ގޮތަށް އިންތިޒާމްކުރުމަށް އިލްތިމާސްކޮށްފައިވާ ކަމަށް މިނިސްޓަރު ފައްޔާޒު ވިދާޅުވިއެވެ.
ހުޅުމާލޭގައި އިރުމަތީ ފަރާތު އަތިރިމަތީގައި ކެފޭ، ރެސްޓައުރެންޓްތަކުގެ އަމިއްލަ ތަނެއްގެ ގޮތުގައި ބޭނުންކޮށް، އާންމުން ބޭނުންތަކަށް އެ ސަރަހައްދު ބޭނުންކުރަން ދަތިވަމުންދާތީ ގިނަ ބަޔަކު ދަނީ ޝަކުވާކުރަމުންނެވެ.
