ވަގުތީ ގޮތުން އިމާރާތް ކުރުން ހުއްޓުވައިފިނަމަ މުޅި ސިނާއަތަށާއި، ގައުމަށް ފޫނުބެއްދޭ ވަރުގެ ބޮޑު ގެއްލުމެއް ލިބޭނެ ކަމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އިން ބުނެފިއެވެ.
މާފަންނުގައި ހަދަމުންދާ އިމާރާތެއްގެ މަތިން ސިމެންތި ބަސްތާއެއް ވެއްޓި، ކުޑަ ކުއްޖެއް ނިޔާވުމާއި ގުޅިގެން ބޭއްވި ނޫސްވެރިންގެ ބައްދަލުވުމުގައި މަސީ އެކްޒެކްޓިވް ބޯޑުގެ މެންބަރު މުހައްމަދު އަލީ ޖަނާހް ވިދާޅުވީ އިމާރާތް ކުރުމުގެ ގާނޫނުގެ ދަށުން ހަދަންޖެހޭ ގަވާއިދުތައް ނުހަދައި އިމާރާތްކުރުމުގެ ހުއްދަ ނުދިނުމަށާއި، ވަގުތީގޮތުން އިމާރާތްކުރުން ހުއްޓުވުމަށް އެދި ސިވިލް ކޯޓަށް ގާނޫނީ ވަކީލުންތަކެއް މައްސަލަ ހުށައެޅުން އެއީ ހައްލު ނޫން ކަމަށެވެ. އަދި މިއީ ރާއްޖޭގައި އޮތް ދެވަނަ އަށް އެންމެ ބޮޑު ސިނާއަތްކަން ފާހަގަކުރައްވައި، ޖަނާހު ވިދާޅުވީ މަސައްކަތް ހުއްޓުވައިފިނަމަ މުޅި ސިނާއަތަށާއި، ރާއްޖޭގެ އިކޮނޮމީއަށް ބޮޑެތި ގެއްލުންތަކެއް ލިބޭނެ ކަމަށެވެ.
ޖަނާހު ވިދާޅުވީ މި ސިނާއަތުގައި ވަރަށް ރަނގަޅަށް މަސައްކަތް ކުރާ ފަރާތްތަށް އުޅޭ ކަމަށާއި، މިފަދަކަމެއް ކޮށްފިނަމަ މިއީ އެފަރާތްތަކަށްވާ ބޭއިންސާފެއް ކަމަށެވެ.
"ކޯޓު އަމުރުގެ ދަށުން އެކަހަލަކަމެއް ހިނގާފިއްޔާ އެއީ މުޅި އިންޑަސްޓްރީއަށްވެސް، ރާއްޖެއަށްވެސް، މުޅި އިކޮނޮމީއަށް ވެސް ލިބޭ ގެއްލުމެއް. އިކޮނޮމީ މިއޮތީ ވަރަށް އެހެން ކަހަލަ ނޫޒުކު ހާލަތެއްގައި. ކޮންމެ ދުވަހަކު ވެސް ހަމަ ޓެކްސްއާ އެއްޗެހި ބޭނުންވާ ހާލަތެއްގައި. އެގިވަޑައިގަންނަވާނެ މީޑިއާގައި ހުރި ޚަބަރުތަކުން. ކޮންމެ ހަފްތާއަކު ދައުލަތުގެ ހަރަދުތައް އެބަ ހިނގާ. އެއާއެކު ޓެކްސްއަށް މިޑިޕެންޑް މިވަނީ. އެންމެ ހަފްތާއަކު ހުއްޓާލިއަސް ކޮންޓްރެކްޓަރުންގެ އިތުރުން ހަމަ ޓެކްސްއިން ހަމަ ނޭދެވޭ އަސަރު އިކޮނޮމީއަށް ވަރަށް ބޮޑަށް ކުރާނެ" ޖަނާހު ވިދާޅުވިއެވެ.
ޖަނާހު ވިދާޅުވީ މިއީ އެކަކު އަނެކަކު ކުށްވެރިކުރަންވީ ވަގުތު ނޫން ކަމަށާއި، މިކަން ހައްލުކުރުމަށް އެންމެންގެ އެއްބާރުލުން ދޭންޖެހޭ ކަމަށެވެ. އޭނާ ވިދާޅުވީ އިމާރާތް ކުރުމުގެ ދާއިރާގައިވެސް ވަރަށް ހާލުން މަސައްކަތް ކުރާ މީހުން އުޅޭ ކަމަށާއި، އެންމެންނަކީ އަތްމަތި އެހާތަނަވަސް މީހުން ނޫން ކަމަށެވެ. އެގޮތުން މިއީ އެމީހުންނަށް އަދަބު ދޭންވީ ވަގުތު ނޫން ކަމަށާއި، މިއީ އެމީހުންނަށް ރަނގަޅު މަގު ދައްކައިދޭންވީ ވަގުތު ކަމަށް އޭނާ ވިދާޅުވި އެވެ.
"މިއަދު ސަރުކާރުންވެސް، ސިޓީ ކައުންސިލުން ވެސް، ރޭއްސުރެން އެނަންގަވަމުން ގެންދެވީ ވަރަށް ހަރުދަނާ ފިޔަވަޅުތަކެއް. އަދި ރައީސުލްޖުމްހޫރިއްޔާގެ ގައިޑެންސް ވަރަށް ފުރިހަމަ. މަސީން މިކަމަށް ފުލް ސަޕޯޓް ދޭނަން. އެއި ކަން ހިނގިތަން ތަހުގީގު ކުރައްވަމުން އެބޭފުޅުންގެ މަސައްކަތް މިވަގުތަށް ހުއްޓުވާލުމަށްފަހު އެހެން އެންމެނަށް މަސައްކަތް ކުރެވޭނެ ގޮތް ހައްދަވާފަ. ދެން އެގެންދަވަނީ މިހާރު ހިނގަމުންދާ ޕްރޮޖެކްޓްތަކެއްގެ ސޭފްޓީ ރިވިއު ކުރައްވަމުން" ޖަނާހު ވިދާޅުވިއެވެ.
މަސީގެ ރައީސް އަބްދުﷲ މުހައްމަދު ވިދާޅުވީ އިމާރާތުގެ މަސައްކަތް ކުރިއަށްދާއިރު، އާންމުންގެ އެއްބާރުލުން ވެސް ބޭނުންވާ ކަމަށެވެ. ނަމަވެސް މަސައްކަތް ކުރިއަށްދާއިރު، މަގަށް ނުވަނުމަށް އެދި ބޯޑު ބެހެއްޓި ނަމަވެސް އެއަށް ބެލުމެއް ނެތި އާންމުން އެމަގަކުން ވަދެގެންދާ ކަމަށް އޭނާ ވިދާޅުވިއެވެ.
އަބްދުﷲ ވިދާޅުވީ މަސައްކަތް ކުރަމުންދާ ސަރަހައްދުގެ ނުރައްކާތެރިކަން އާންމުންނަށް އިހުސާސްކުރެވެންޖެހޭ ކަމަށާއި، މިފަދަ ކަންކަމަށް އާންމުން ހޭލުންތެރިވާން ޖެހޭ ކަމަށެވެ.
"މީހުންގެ ހޭލުންތެރިކަން ވަރަށް މުހިންމު. ބޯޑު ބަހައްޓާފަ، ޓޭޕް ޖަހާފަ ހުންނައިރުވެސް އެތާ ފާރުކައިރިން ލާފަ ދަނީ. މިކުރާ މަސައްކަތުގައި އާންމުގެ ހޭލުންތެރިކަން ބަލަހައްޓަންޖެހޭ. ހުއްޓުވުމަށް މަސައްކަތް ކުރަންޖެހިއްޖެނަމަ ޒުވާބަކަށް ދާނީ." އަބްދުﷲ ވިދާޅުވިއެވެ.
އަބްދުﷲ ވިދާޅުވީ އިމާރާތް ކުރާއިރު މަސައްކަތްތެރިންގެ ސަލާމަތާއި، ރައްކާތެރިކަމުގެ އިތުރުން، މަސައްކަތް ކުރަމުންދާ ސަރަހައްދުގެ ސަލާމަތީ ކަންކަން ބެލެހެއްޓުމަށް ސަރުކާރުން އަޅާ ކޮންމެ ކަމަކަށް މަސީން އެއްބާރުލުން ދޭނެ ކަމަށެވެ.
