ކައިވެނި ކުރަން އުޅޭ ވާހަކަ ޕަރިނީތީ ދޮގުކޮށްފި

ބޮލީވުޑްގެ ތަރި ޕަރިނީތީ ޗޯޕްރާ މި އަހަރު ކައިވެނި ކުރާން އުޅޭ ކަމަށް ނޫސްތަކުން ފަތުރަމުންދާ ހަބަރުތައް އޭނާ ދޮގު ކޮށްފިއެވެ.

ޕަރިނީތީ މިކަން ދޮގު ކޮށްފައިވަނީ އޭނާ ކުރި ޓުވީޓެއްގައެވެ. ޕަރިނީތީ ކައިވެނި ކުރަން އުޅޭ ވާހަކަ އެންމެ ފުރަތަމަ ފަތުރާފައި ވަނީ މުމްބާއި މިރަރ ކިޔާ ނޫހަކުންނެވެ.

މުމްބާއި މިރަރ ނޫސް ޓެގްކޮށް ޕަރިނީތީ ކުރި ޓްވީޓްގައި ވަނީ "ތީ ހަޤީޤަތެއް ނެތް ހުސް ދޮގުވާހަކަ ތަކެއް. ކައިވެނިކުރަން ވީމާ އަހަރެން އުފަލުން އެކަން ހާމަކުރާނަން" އޭނާ ލިޔުނެވެ.

މުމްބާއީ މިރަރއިން ރިޕޯޓްކޮށްފައިވާ ގޮތުގައި ޕަރިނީތީ ކައިވެނި ކުރަނީ އޭނާ މިހާރު ރައްޓެހިވެގެން އުޅޭ ޗަރިތު ދޭސާއީއާއެވެ.

ކަރަން ޖޯހަރްގެ ދަރްމާ ޕްރޮޑަކްޝަން ގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކުރާ ދޭސާއީއާ ޕަރިނީތީ ބައްދަލު ވެފައިވަނީ 2016 ވަނަ އަހަރު ކަމަށް ރިޕޯޓްތައް ބުނެއެވެ.

ދޭސާއީ ވަނީ މީގެ ކުރިން ރިތިކް ރޯޝަންގެ 'އަގްނީޕަތު' ގައި އެސިސްޓެންޓް ޑައިރެކްޓަރެއްގެ ގޮތުގައި މަސައްކަތް ކޮށްފައިއެވެ. ޕަރިނީތީ އާއި ދޭސާއީ ވަނީ ދާދި ފަހުން، ޕަރިނީތީގެ ދެބެންގެ ދެދަރި ދައްތަ، ޕްރިޔަންކާ ޗޯޕްރާގެ ކައިވެނީގެ ހަފްލާއިން އެކުގައި ފެނިފައިއެވެ.

ޕަރިނީތީ އާއ ދޭސާއީ ރައްޓެހިވެގެން އުޅޭކަން މިހާތަނަށް މީޑީއާއަށް ހާމަ ކޮށްފައެއް ނުވެއެވެ.

ޕަރިނީތީ ދެން އެންމެ އަވަހަށް ފެނިގެންދާނީ ދިބާކަރް ބެނަރްޖީގެ ޑައިރެކްޓް ކުރާ ފިލްމު "ސަންދީޕް އޯރް ޕިންކީ ފަރާރް" އިން އަރްޖުން ކަޕޫރުއާ އެއްކޮށެވެ. ފިލްމު ރިލީޒް ކުރަން ހަމަޖެހިފައިވަނީ 2019 އަހަރުގެ މާޗް މަހުއެވެ.