ބައެއް މަޝްރޫއުތަކާ ގުޅޭ ގޮތުން ރައްޔިތުންގެ ހިޔާލު ހޯދަން ބައްދަލުވުމެއް ބާއްވައިފި
13 ޑިސެމްބަރު 2018 | ބުރާސްފަތި 04:03ބައްދަލުވުމުގައި ޔޫތު މިނިސްޓަރު މަހުލޫފް ބައިވެރިވަޑައިގެންނެވި
ސިޓީ ކައުންސިލުން އިންތިޒާމުކޮށްގެން ރައްޔިތުންގެ ހިޔާލު ހޯދަން ބޭއްވި ބައްދަލުވުމުގެ ތެރެއިން
ސަރުކާރުން ހިންގަން ނިންމާފައިވާ ބައެއް ޕްރޮޖެކްޓުތަކާއި ބެހޭ ގޮތުން ރައްޔިތުންގެ ހިޔާލު ހުރީ ކިހިނެއްތޯ ބެލުމުގެ ގޮތުން މާލޭ ސިޓީ ކައުންސިލުން އިންތިޒާމް ކޮށްގެން މަޝްވަރާ ބައްދަލުވުމެއް ބާއްވައިފިއެވެ.
ބުދަ ދުވަހުގެ ރޭ އިސްކަންދަރު ސްކޫލްގެ ހޯލުގައި ބޭއްވި އެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވިފައި ވަނީ ޔޫތު މިނިސްޓްރީން ހިންގަން ނިންމާފައިވާ މާލޭގެ ސްވިމިންގް ޕޫލެއް އެޅުމާއި، މާލޭގެ ސަރަހައްދުތަކުގައި ޖިމް އިކުއިޕްމަންޓު ބެހެއްޓުމާއި އަދި ހަފްތާ ބަންދުގައި ބޭއްވޭ "ހަފްތާ ރެސް" މާރުކޭޓާއި ބެހޭ ގޮތުންނެވެ. އެ ބައްދަލުވުމުގައި މިނިސްޓްރީ އޮފް އަރޓްސް، ކަލްޗަރ އެންޑް ހެރިޓޭޖްއިން ކުރަން ނިންމާފައިވާ މާލޭގައި ހުރި ތަރިކައިގެ ލިސްޓެއް އެކުލަވާލުމާއި ބެހޭ ގޮތުން ވެސް ވާހަކަ ދެކެވުނެވެ.
އެ ބައްދަލުވުމުގައި މިނިސްޓަރު މަހްލޫފު ވިދާޅުވީ އެފަދަ ބައްދަލުވުންތައް ބޭއްވުން ވަރަށް މުހިންމު ކަމަށާއި ރައްޔިތުންނާއި ގާތުން ވެރިކަން ކުރަން ބޭނުންވާ ސަރުކާރަކަށް ރައްޔިތުންގެ ހިޔާލު ހޯދުން ވަރަށް މުހިންމު ކަމަށެވެ. އަދި ލާމަރުކަޒީ އުސޫލުން ސަރުކާރެއް އެއްމެ ފުރިހަމަ އަށް ހިންގޭނީ ވެސް ރައްޔިތުންގެ ހިޔާލު ހޯދައިގެން ކަމަށް ވެސް އޭނާ ވިދާޅުވިއެވެ.
ސިޓީ ކައުންސިލްއާއި ޔޫތު މިނިސްޓްރީގެ އިސް ބޭފުޅުން ބައިވެރިވި މި ބައްދަލުވުމުގައި ބައިވެރި ނުވެވުނު ފަރާތްތަކަށް ވެސް އާދީއްތަ ދުވަހާއި ހަމައަށް މީސް މީޑިއާގެ ޒަރިއްޔާއިން ހިޔާލު ފާޅުކުރުމުގެ ފުރުސަތު އޮންނާނެ އެވެ.
