ރާއްޖެ އިސްލާމްވި ގޮތާ ބެހޭ އިތުރު ދިރާސާކުރަން ޖެހޭ: މައުމޫން
ނޭނގިހުރި ކަންކަން ހޯދުން މުހިއްމު: މައުމޫން
ރައީސް މައުމޫން
މީގެ 865 އަހަރުކުރިން ދިވެހިރާއްޖެ އިސްލާމްވި ގޮތާ ބެހޭ ގޮތުން އިތުރު ދިރާސާތަކެއް ހެދުން މުހިއްމު ކަމަށް ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެއެވެ.
ރައީސް މައުމޫން ހޯމަ ދުވަހު ކުރެއްވި ޓްވީޓެއްގައި ވިދާޅުވީ ރާއްޖެ އިސްލާމްވި ގޮތާ ބެހޭ ގޮތުން ދިރާސާތަކެއް ކުރުމުގެ މުހިއްމުކަން، ރާއްޖެ އިސްލާމްވި ދުވަސް ފާހަގަކުރުމަށް އާދިއްތަ ދުވަހުގެރޭ ބޭއްވި ރަސްމިއްޔާތުން އެނގިގެން ހިނގައްޖެ ކަމަށެވެ. އަދި ރާއްޖެ އިސްލާމްވި ގޮތާ ބެހޭ ގޮތުން ނޭނގި ހުރި ކަންކަން ހޯދުން މުހިއްމު ކަމަށް އެމަނިކުފާނު ފާހަގަކުރެއްވިއެވެ.
އަދި މި ކަމުގައި ސަރުކާރުގެ ކަމާ ބެހޭ ފަރާތްތަކާއި އަމިއްލަ ފަރާތްތަކުން ވެސް ދިރާސާކޮށް ހޯދުންތައް ހޯދުމަށް ރައީސް މައުމޫން ގޮވާލެއްވިއެވެ. ތާރީޚާއި ސަޤަފަތާއި ބެހޭ ކަންކަން ބަލަހައްޓާ މިނިސްޓްރީ ކަމަށްވާ ހެރިޓޭޖް މިނިސްޓްރީގެ ވަޒީރަކީ ރައީސް މައުމޫންގެ ދަރިކަނބަލުން ޔުމްނާ މައުމޫނެވެ.
މީލާދީ ގޮތުން 1153 ވަނަ އަހަރު ބުޑިސްޓް ދީނުގައި އޮތް ދިވެހިރާއްޖެ އިސްލާމްވި ގޮތާއި ބެހޭ ގޮތުން ތަފާތު އެކި ވާހަކަތައް ކިޔައި އުޅެއެވެ. އަދި ރާއްޖޭގެ އެކި ސަރަހައްދުތައް އިސްލާމްވި ތާރީޚުތަކާއި ބެހޭ ގޮތުން ބައެއް ޚިލާފުތައް ހުރެއެވެ. ރާއްޖެ އިސްލާމްވި ދުވަސް އާދިއްތަ ދުވަހު ފާހަގަކުރަމުން ދިޔައިރު، ތާރީޚު ދިރާސާކުރާ ބައެއް ޒުވާނުން ސޯޝަލް މީޑިއާގައި އެކަމާއި ބެހޭ ގޮތުން ބަހުސްތަކެއް ކުރިއެވެ.
