އަލިފުށި އޯލް މެމްބާސް އިންޓެގްރޭޓެޑް އެމިޓީ އެސޯސިއޭޝަން (އާމިއާ) އިން އިންތިޒާމުކޮށްގެން އަލިފުށީގައި ކުރިޔަށް ގެންދާ އާމިއާ ފުޓްސަލް ޗެލެންޖްގެ ސެމީ ފައިނަލަށް ދަތުރުކުރި ޓީމުތައް ކަށަވަރުވެއްޖެއެވެ.

މުބާރާތުގެ ސެމީ އަށް ދަތުރުކޮށްފައި ވަނީ އެލްޖީ އެފްސީ އާއި އެފްސީ ކުޑަ ދޮންބެ އާއި ހަތްބޯރާހި އަދި ސްޓްރޭންޖާސްއެވެ.

މުބާރާތުގެ ސެމީ އަށް އެލްޖީ ދަތުރުކުރީ ކުއާޓާ ފައިނަލުގައި ޓީމް ކުޑަ އިނގިލީގެ މައްޗަށް 1-5 ގެ ނަތީޖާއަކުން ކުރިހޯދައިގެންނެވެ. ސްޓްރޭންޖާސް ސެމީ އަށް ދަތުރުކުރީ އޭއީވައި ޖީ އެފްސީ 2-3 ގެ ނަތީޖާ އިން ބަލިކޮށްގެންނެވެ. ހަތްބޯރާހި ސެމީ އަށް ދަތުރުކުރީ އާންދޯ 1-4 ގެ ނަތީޖާ އިން ބަލިކޮށްގެންނެވެ. އަދި އެފްސީ ކުޑަ ދޮންބެ ސެމީ އަށް ދަތުރުކުރީ ވާނުވާ 4-5 ގެ ނަތީޖާ އިން ބަލިކޮށްގެންނެވެ.

މުބާރާތުގެ ސެމީގެ މެޗުތައް ހޮނިހިރު ދުވަހު ފަށާއިރު، ފުރަތަމަ މެޗުގައި ބައްދަލުކުރާނީ އެލްޖީ އެފްސީ އާއި ހަތްބޯރާހި އެވެ. އަދި ސެމީގެ ދެވަނަ މެޗުގައި ބައްދަލުކުރާނީ އެފްސީ ކުޑަދޮންބެ އަދި ސްޓްރޭންޖާސް އެވެ.

މުބާރާތުގެ ފައިނަލް މެޗު ޑިސެމްބަރު 10 ވަނަ ދުވަހު ކުޅުމަށް ހަމަޖެހިފައިވާ އިރު، ޗެމްޕިއަން ޓިމަށް 25،000 ރުފިޔާ އަދި ރަނަރަޕް ޓީމަށް 10،000 ރުފިޔާ ދިނުމަށް ވަނީ ނިންމާފައެވެ.

މީގެ އިތުރުން މުބާރާތުގެ އެންމެ މޮޅު ކުޅުންތެރިޔާ އަށް 1،500 ރުފިޔާ ދިނުމަށް ނިންމާފައިވާ އިރު، އެންމެ މޮޅު ޒުވާން ކުޅުންތެރިޔާ އަށް 1،000 ރުފިޔާ ދިނުމަށް ވެސް ވަނީ ނިންމާފައެވެ.