ތައިލެންޑުން ރިކޯޑް އަދަދަކަށް މެތަމްފެޓަމިން އަތުލައިގަތުން

މަސްތުވާތަކެތީގެ ބާވަތެއް ކަމަށްވާ މެތަމްފެޓަމިންގެ 15 މިލިއަން ގުޅަ އަތުލައިގަނެވިފައިވާކަމަށް ތައިލެންޑުގެ ފުލުހުން ބުނެފިއެވެ.

މި ތަކެތި އަތުލައިގެންފައިވަނީ ތައިލެންޑް އާއި މިޔަންމާ ގުޅޭ ބޯޑަރު ސަރަހައްދުގައި، ބުރާސްފަތި ދުވަހުގެރޭ ތައިލޭންޑުގެ ފުލުހުން ހިންގި ޚާއްސަ އޮޕަރޭޝަނެއްގައެވެ.

ތައިލެންޑުގެ ނާކޮޓިކްސް ސަޕްރެޝަން ބިއުރޯއިން ހާމަކޮށްފައިވާ ގޮތުގައި މެތަމްފެޓަމިން ހޯދާފައިވަނީ މަސްތުވާތަކެތި އުފުލާކަމަށް ޝައްކުކުރެވިގެން ފާސްކުރި ލޮރީއެއްގެ ތެރެއިންނެވެ.

އެލޮރީ ދުއްވަން އިނީ 31 އަހަރުގެ ފިރިހެނެއް ކަމަށާއި ފުލުހުން ލޮރީ މަޑުކުރަން އެންގުމުން އެނާ ފުލުހުންނާއި ދިމާލަށް ބަޑިޖަހަން ފެށިކަމަށް ރިޕޯޓްތައް ބުނެއެވެ. ފުލުހުންނާއި ލޮރީ ޑްރައިވަރާއި ދެމެދު ބަދަލުކުރި ބަޑީެ ހަމަލާތަކުގައި ލޮރީ ޑްރައިވަރު މަރުވެފައިވާކަން ފުލުހުން ވަނީ ހާމަކޮށްފައެވެ.

މަސްތުވާތަކެތި ހިފައިގެން ދަތުރުކުރި ލޮރީގެ ތެރޭގައި އިތުރު ދެމީހަކު ތިބިކަމަށާއި އެމީހުން ފިލާފައިވާކަމަށް ތައިލެންޑު ފުލުހުންނާ ހަވާލާދީ ރިޕޯޓްތައް ބުނެއެވެ. މެތަމްފެޓަމިން ގުޅަތައް ބަންދުކޮށްފައި ހުރި ޕެކެޓްތަކުގެ ބޭރުގައި "999" ހިމެނޭ މާކެއް ޖަހާފައިވާ ކަމަށާއި، މި ނަންބަރަކީ މިޔަންމާގެ ޑްރަގް ވިޔަފާރިވެރިން ޓްރޭޑްމާކެއް ގޮތުގައި ބޭނުންކުރާ ނަމްބަރެއް ކަމަށް ފުލުހުންނާއި ހަވާލާދީ މީޑިއާތަކުން ވަނީ ރިޕޯޓްކޮށްފައެވެ.

ފާއިތުވީ ހަފްތާގައި ތައިލެންޑްގެ 17 ސަރަހައްދަކުން 79 މިލިއަން ގުޅަ މެތަމްފެޓަމިން އަތުލައިގެންފައިވާކަމަށް ފުލުހުންގެ ރިޕޯޓްތައް ބުނެއެވެ.

ތައިލެންޑާއި މިޔަންމާ ގުޅޭ ބޯޑަރު ހުރަސްކޮށް ތައިލެންޑަށް މަސްތުވާތަކެތީގެ ގިނަ ބާވަތްތަކެއް ދަނީ އެތެރެކުރަމުންނެވެ.