ރައީސް ސޯލިހުގެ ކެބިނެޓަށް ބޮޑު އަގުލަބިއްޔަތަކުން މަޖިލީހުން ރުހުން ދީފި
ފަސް ވަޒީރަކަށް 72 ވޯޓު ލިބިވަޑައިގެންނެވި
ރައީސް ސޯލިހުގެ ކެބިނެޓް ވަޒީރުން
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ކެބިނެޓްގެ 20 ވަޒީރުންނަށް ރައްޔިތުންގެ މަޖިލީހުން ރުހުން ދީފިއެވެ.
ޕާޓީތައް އުކުލެވިގެން އުފައްދާފައިވާ ސަރުކާރުގެ ކެބިނެޓަށް ރައީސް ސޯލިހު ފުރަތަމަ އައްޔަން ކުރެއްވި ވަޒީރުންނަށް ރުހުން ދީފައި ވަނީ ވަކިވަކިންނެވެ. އެގޮތުން ރައީސް ސޯލިހުގެ ކެބިނެޓަށް ރުހުން ދިނުމަށް ސަރުކާރު ކޯލިޝަންގެ މެމްބަރުންގެ އިތުރުން އިދިކޮޅު ޕީޕީއެމާއި އެމްޑީއޭގެ މެމްބަރުން ވެސް ވޯޓު ދެއްވިއެވެ.
ރުހުން ލިބިވަޑައިގެންނެވި ވަޒީރުންގެ ތެރެއިން އެންމެ ގިނަ ވޯޓާއެކު ރުހުން ލިބިވަޑައިގެންނެވީ ޔޫތު މިނިސްޓަރު އަހުމަދު މަހުލޫފާއި ހައުސިން މިނިސްޓަރު އާމިނަތު އާތިފާ އާއި ފިޝަރީޒް މިނިސްޓަރު ޒަހާ ވަހީދާއި އެންވަޔަރަމަންޓް މިނިސްޓަރު ޑރ. ހުސައިން ރަޝީދު ހަސަންގެ އިތުރުން ބަންޑާރަ ނައިބު އިބްރާހިމް ރިފްއަތަށެވެ. އެ ފަސް ވަޒީރުންނަށް ރުހުން ދިނުމަށް ވޯޓު ދެއްވީ 72 މެމްބަރުންނެވެ.
އެންމެ ދަށުން މަޖިލީހުން ރުހުން ލިބިވަޑައިގެންނެވީ ޖެންޑާ މިނިސްޓަރު ޝިދާތާ ޝަރީފަށެވެ. އޭނާއަށް ރުހުން ދިނުމަށް ވޯޓު ދެއްވީ 67 މެމްބަރުންނެވެ. ޝިދާތާއަށް ރުހުން ދޭން ނުފެންނަ ކަމަށް ދެ މެމްބަރަކު ވޯޓު ދެއްވިއެވެ.
ރުހުން ލިބިވަޑައިގެންނެވި 20 ވަޒީރުން:
ރުހުން ލިބިވަޑައިގެންނެވި ރައީސް ސޯލިހުގެ ކެބިނެޓުގައި ހިމެނިވަޑައިގަންނަވަނީ ފޮރިން މިނިސްޓަރު އަބްދުﷲ ޝާހިދާއި ޑިފެންސް މިނިސްޓަރު މާރިޔާ އަހުމަދު ދީދީ އާއި ހޯމް މިނިސްޓަރު ޝެއިހް އިމްރާން އަބްދުﷲ އާއި ފިނޭންސް މިނިސްޓަރު އިމްރާހިމް އަމީރާއި ޕްލޭނިން އެންޑް އިންފްރާސްޓްރަކްޗަރ މިނިސްޓަރު މުހައްމަދު އަސްލަމާއި ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަނާއި ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލާއި ހެލްތު މިނިސްޓަރު އަބްދުﷲ އަމީނާއި އެޑިއުކޭޝަން މިނިސްޓަރު ޑރ. އައިޝަތު އަލީ އާއި ޓްރާސްޕޯޓް މިނިސްޓަރު އައިޝަތު ނަހުލާ އާއި އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫނާއި ޓޫރިޒަމް މިނިސްޓަރު އަލީ ވަހީދާއި އިކޮނަމިކް މިނިސްޓަރު ފައްޔާސް އިސްމާއިލާއި ފިޝަރީޒް މިނިސްޓަރު ޒަހާ ވަހީދާއި އިސްލާމިކް މިނިސްޓަރ ޑރ. އަހުމަދު ޒާހިރާއި ހައުސިން މިނިސްޓަރު އާމިނަތު އާތިފާ އާއި ޔޫތު މިނިސްޓަރު އަހުމަދު މަހުލޫފާއި ޖެންޑާ މިނިސްޓަރު ޝިދާތާ ޝަރީފާއި އެންވަޔަރަމަންޓް މިނިސްޓަރު ޑރ. ހުސައިން ރަޝީދު ހަސަނ ބަންޑާރަ ނައިބު އިބްރާހިމް ރިފްއަތެވެ.
