ފާޑު ކިޔުންތަކަށް މަރުހަބާ ކިޔަން، ކަންތައްތައް އިސްލާހު ކުރުމަށް މަސައްކަތްކުރާނަން: މިނިސްޓަރ މަލީހު
1 ޑިސެމްބަރު 2018 | ހޮނިހިރު 14:28ސަރުކާރު ހިންގޭނީ ފާޑުކިޔުންތަކާއި އެކު
ކޮމިއުނިކޭޝަންސް މިނިސްޓަރ މަލީހު
ފާޑު ކިޔުންތަކަށް އަބަދު ވެސް މަރުހަބާ ކިޔާ ކަމަށާއި އެކަންތައްތައް އިސްލާހު ކުރުމަށް މަސައްކަތް ކުރައްވާނެކަމަށް މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މަލީޙް ޖަމާލް ވިދާޅުވެއްޖެ އެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ މި ސަރުކާރުން ކުރާ ކަންތައްތަކަށް ފާޑު ކިޔަން ބޭނުންވާ ފަރާތްތަކަށް ފާޑު ކިޔޭނެ ކަމަށާއި ރާއްޖޭގެ ކުރިއެރުން ބިނާވެގެން ދަނީ ފާޑުކިޔާމާއި އެކު ކަމަށެވެ. މި މޭރުމުން ވާހަކަފުޅު ދައްކަވަމުން މިނިސްޓަރ ވިދާޅުވީ ފާޑު ކިޔުންތައް އަމާޒުވިޔަސް އެ ފަރާތްތަކާއި މެދު އެއްވެސް ހިތްބުރަކަމެއް ނު ބާއްވާކަށާއި އެފަދަ ކަންތައްތައް ނަންގަވަނީ ވަރަށް ޕޮޒިޓިވްކޮށް ކަމަށެވެ.
"ފާޑު ކިޔެންޖެހޭނެ. މީހާއަށް ވެސް ފާޑު ކިޔެންޖެހޭނެ. ރަނގަޅުކަމެއް ކޮށްފިއްޔާ ރަނގަޅުވީ ކީއްވެގެން ކަން ވެސް ކިޔެންޖެހޭނެ. ކޮންމެ ފަދަ އެއްޗެއް ވެސް ވިދާޅުވާންވީ. އޮންލައިންކޮށް ވެސް އެހެން ގޮތްގޮތުން ވެސް، ޓީވީގެ ޒަރިއްޔާއިން ވެސް ގުޅާފައި ވެސް ދަންނަވަންވީ. އަޅުގަނޑުގެ މުޅި ވިސްނުން ހުރީ ކަންކަން އިސްލާހުކުރަން،" މަލީހު ވިދާޅުވިއެވެ.
މިނިސްޓަރ މަލީހު ވިދާޅުވީ ޓެކް ކައުންސިލްގެ އިތުރުން ސައިންސް ކައުންސިލް އުފެއްދުމުގެ ބޭނުމަކީ ވެސް މި ދާއިރާގައި މަސައްކަތް ކުރައްވާ އެކަމަށް އެންމެ ގާބިލު ފަރާތްތަކަށް ފުރުސަތު ދިނުމަށް ކަމަށެވެ. އަދި ހަމ މިއާއި އެކު މި ކައުންސިލްތައް ކުރިޔަށް ދާނީ އެފާރަތްތަކުގެ މަޝްވަރާ އާއި އެކު ކަމަށް މިނިސްޓަރު ވިދާޅުވިއެވެ. މިނިސްޓަރ ވިދާޅުވީ މަޤާމުގެ މަސްއޫލިއްޔަތު އުފުއްލެވޭނެ ޤާބިލްކަން އެބަހުރި ކަމާށާއި އިތުރަށް ދަސްކުރައްވަން ޖެހިވަޑައިގަންނަވާ ކަންތައްތައް ދަސްކުރައްވަމުން ގެންދަވާނެ ކަމަށެވެ.
